بھارتی ٹیکنیشن طیارے کے لینڈنگ گیئر کے دروازے میں پھنس کر ہلاک

ویب ڈیسک  بدھ 10 جولائ 2019
حادثہ لینڈنگ گیئر کی معمول کی جانچ پڑتال کے دوران پیش آیا۔ فوٹو : فائل

حادثہ لینڈنگ گیئر کی معمول کی جانچ پڑتال کے دوران پیش آیا۔ فوٹو : فائل

کلکتہ: بھارت میں معمول کی جانچ پڑتال کے دوران طیارے کا ٹیکنیشن لینڈنگ گیئر کے خود کار ہائیڈرولک دروازے کے درمیان پس کر ہلاک ہوگیا۔

بین الاقوامی خبر رساں ادارے کے مطابق  کلکتہ ایئرپورٹ پر بھارتی ایئرلائن اسپائس جیٹ کے طیارے میں تربیتی ٹیکنیشن لینڈنگ گیئر میں معمول کی جانچ پڑتال کے دوران خود کار ’ہائیڈرولک ڈور‘ بند ہونے کے باعث پٹوں کے درمیان پھنس جانے کے باعث ہلاک ہوگیا۔

ریسکیو اہلکاروں نے لینڈنگ گیئر کے خودکار دروازے کو توڑ کر 26 سالہ ٹیکنیشن روہت پانڈے کو نکالا، اس کے جسم کے کئی حصے دو ٹکڑوں میں تقسیم ہوگئے تھے۔ لاش لواحقین کے حوالے کردی گئی ہے جب کہ سول ایوی ایشن نے واقعے کی تحقیقات کے لیے انکوائری کمیٹی تشکیل دے دی ہے۔

سوشل میڈیا پر صارفین نے غفلت اور لاپرواہی برتنے پر ایئرلائن انتظامیہ کو آڑے ہاتھوں لیتے ہوئے کہا کہ بغیر کسی تجربہ کار سپروائزر کے تربیتی ٹیکنیشن کو لینڈنگ گیئر کی جانچ پڑتال کے لیے بھیجنا مجرمانہ غفلت ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔