متحدہ عرب امارات مودی کو ایوارڈ دینے کا فیصلہ واپس لے، برطانوی رکن اسمبلی

 لندن: برطانوی رکن پارلیمنٹ ناز شاہ نے ولی عہد محمد بن زاید سے انسانیت سوز مظالم میں ملوث بھارتی وزیراعظم مودی کو متحدہ عرب امارات کا سب سے بڑا سویلین اعزاز دینے کے فیصلے کو واپس لینے کا مطالبہ کیا ہے۔

برطانوی پارلیمنٹ کی رکن ناز شاہ نے سماجی رابطے کی ویب سائٹ پر اپنا خط شیئر کرتے ہوئے لکھا کہ ولی عہد محمد بن زاید انسانیت کے دشمن مودی کو اعزاز سے نوازنے کا فیصلہ واپس لیں۔

ناز شاہ نے اپنے خط میں لکھا کہ بھارتی وزیراعظم نریندر مودی گجرات میں مسلمانوں کے قتل عام میں ملوث رہے ہیں اور اب انہوں نے کشمیر میں بھی اپنے جارحانہ اقدام سے انسانی حقوق کی پامالی کرتے ہوئے جینے کا حق چھین لیا ہے۔

Yesterday I wrote to Sheikh Mohamed bin Zayed, Crown Prince of Abu Dhabi urging him to reconsider giving an award to Prime Minister Modi, whilst the people of Kashmir suffer at his hands. #WeStandWithKashmir pic.twitter.com/5wpoPGUDT2

— Naz Shah MP (@NazShahBfd) August 20, 2019

معزز رکن اسمبلی نے لکھا کہ متحدہ عرب امارات کا سب سے بڑا سویلین ایوارڈ آپ کے والد شیخ زاید کے نام سے منسوب ہے جو کچلے ہوئے محکوم لوگوں کی داد رسی کیا کرتے تھے ایسے شخص کے نام سے موسوم ایوارڈ ایک قاتل کو دینا درست نہیں۔

ناز شاہ نے ولی عہد کو مخاطب کرتے ہوئے لکھا کہ مقبوضہ کشمیر کے مظلوم رہائشی میرے اور آپ کے ہم مذہب ہیں لیکن اس  سے بھی بڑھ کر انسانیت کے رشتے سے بھی ہمیں ان مظلوموں کے ساتھ ظلم اور جارحیت کے خلاف کھڑا ہونا چاہیے۔

برطانوی رکن نے مزید لکھا کہ کسی قسم کا معاہدہ یا کسی اور وجہ سے کشمیر میں مظالم کے خلاف آواز اُٹھانے میں رکاوٹ بن رہی ہے تو کم از کم مظلوموں کے ساتھ یکجہتی کے لیے اس تقریب کو ہی معطل کردیا جائے۔

واضح رہے کہ وزیراعظم نریندر مودی رواں ماہ کی 23 تاریخ کو دو روزہ دورے پر متحدہ عرب امارات پہنچیں گے اور اس دوران ولی عہد محمد بن زاید بھارتی وزیراعظم کو یو اے ای کے سب سے بڑے سویلین اعزاز ’ زاید میڈل‘ سے نوازیں گے۔