عمران خان نے ثابت کردیا کہ چھوٹے آدمی کو بڑی کرسی پرمسلط کیا گیا ہے، ترجمان (ن) لیگ

لاہور: ترجمان (ن) لیگ مریم اورنگزیب کا کہنا ہے کہ بدترین سیاسی انتقام اور حکومتی قوت سیاسی مخالفین کے خلاف استعمال کرنے پر عمران خان کا نام سیاہ حروف میں لکھا جائے گا۔

پنجاب اسمبلی میں قائد حزب اختلاف حمزہ شہباز کا جیل میں گھر کا کھانا بند کرنے پر مذمت کرتے  ہوئے ترجمان مسلم لیگ (ن) مریم اورنگزیب کا کہنا تھا کہ انڈر ٹرائل ملزم کو جیل مینوئل حق دیتا ہے کہ اسے گھر کا کھانا فراہم کیا جا سکتا ہے، لیکن حکومت وقت نے بدترین سیاسی انتقام کی مثال قائم کردی ہے، عمران خان نے ثابت کر دیا کہ چھوٹے آدمی کو بڑی کرسی پر مسلط کر دیا گیا ہے۔

مریم اورنگزیب کا کہنا تھا کہ ہماری بدقسمتی ہے کہ ہمارا مخالف بزدل اور کم ظرف  ہے، آپ کی نالائقی، نااہلی اور جھوٹ کا پول ہر گلی ہر محلے میں کھُل چکا ہے، بدترین سیاسی انتقام اور حکومتی قوت سیاسی مخالفین کے خلاف استعمال کرنے پر تاریخ میں آپ کا نام سیاہ حروف میں لکھاجائے گا۔

ترجمان (ن) لیگ نے کہا کہ اوچھی اور کم ظرف حرکتوں سے ہم جھکنے والے نہیں، ہم منت کریں، یہ آپ کی حسرت ہی رہے گی، نوازشریف اور اس کے شیروں کو بھوکا، پیاسا رکھ کر ان کے حوصلے نہیں توڑے جاسکتے، جتنا مرضی ظلم کر لیا جائے آواز کو دبایا نہیں جا سکتا۔ مسلم لیگ (ن) کے کارکنان کو ڈرا دھمکا کر نیچے نہیں کیا جاسکتا، اور نہ ہی پارٹی کو توڑا جاسکتا ہے، پارٹی بھی زندہ رہے گی کارکن بھی زندہ رہیں گے اور ہم بھی رہیں گے۔