پی ٹی آئی اور ایم کیو ایم کا کٹھ پتلی اتحاد کراچی پر قبضہ کرنا چاہتا ہے، بلاول

ویب ڈیسک  اتوار 15 ستمبر 2019
سندھ کا کیس پنڈی میں کیوں چلاتے ہو؟ بغیر سزا جیل میں کیوں رکھا ہوا ہے، چیئرمین پی پی (فوٹو: فائل)

سندھ کا کیس پنڈی میں کیوں چلاتے ہو؟ بغیر سزا جیل میں کیوں رکھا ہوا ہے، چیئرمین پی پی (فوٹو: فائل)

گڑھی خدا بخش: پیپلز پارٹی کے چیئرمین بلاول بھٹو زرداری نے کہا ہے کہ تحریک انصاف اور ایم کیو ایم کا کٹھ پتلی اتحاد کراچی پر قبضہ کرنا چاہتا ہے اور سندھ کو تقسیم کرنے کی باتیں کی جارہی ہیں۔

گڑھی خدا بخش میں پیپلز پارٹی کے جلسہ عام سے خطاب کرتے ہوئے بلاول بھٹو زرداری نے کہا کہ پی ٹی آئی اور ایم کیو ایم کا کٹھ پتلی اتحاد کراچی پر قبضہ کرنا چاہتا ہے، کٹھ پتلی حکومت کچرے کا بہانہ بنا کر کراچی کا کچرا کرنا چاہتی ہے، جو حکومت کراچی کے3 اسپتال نہیں چلا سکتی وہ کے فور کے لیے پیسہ کہاں سے دیں گے؟ انہوں ںے کہا کہ سندھ کو تقسیم کرنے کی باتیں کی جارہی ہیں، یہ ایک سال سے سندھ حکومت گرانے کی ناکام کوششیں کر رہے ہیں جسے گرفتار کرنا ہے کرلے اپنے مؤقف پر سمجھوتہ نہیں کریں گے، ظلم برداشت کرلیں گے لیکن سر نہیں جھکائیں گے۔

بلاول بھٹو نے کہا کہ میں غیر جمہوری قوتوں کی سازشوں کو ناکام بنانے نکلا ہوں مجھے عوام کی مدد کی ضرورت ہے، صوبوں کو معاشی حق نہیں دیا جا رہا وفاق کی ناکامی کی وجہ سے صوبے دیوالیہ ہورہے ہیں، جی ڈی اے، ایم کیو ایم اور دیگر سندھ کو تقسیم کرنا چاہتے ہیں۔

یہ بھی پڑھیں: عوامی حکومت ہی پاکستان کے مسائل حل کرسکتی ہے، بلاول بھٹو زرداری

چیئرمین پیپلز پارٹی نے کہا کہ انڈین ائیرفورس کے پائلٹ کا انٹرویو تو سلیکٹڈ میڈیا پر چل سکتا ہے مگر آصف زرداری کا نہیں، ہر چینل کنٹرولڈ ہے، آئی ایس آئی کو جے آئی ٹی میں کیوں بٹھا دیتے ہو، سندھ کا کیس پنڈی میں کیوں چلاتے ہو؟ بغیر سزا جیل میں کیوں رکھا ہوا ہے ؟ کیا یہ کوئی اتفاق ہے کہ ساری سیاسی قیادت جیل میں ہے اب تو چیف جسٹس بھی بول رہے ہیں کہ یہ احتساب نہیں انتقام ہے۔

بلاول نے کہا کہ بے نظیر بھٹو نے آمروں کی آنکھوں میں آنکھیں ڈالیں اور پیچھے نہیں ہٹیں، صدر زرداری نے پاکستان کھپے کا نعرہ لگایا اور ملک کو بچایا، پی پی کے کارکنوں پر تشدد کیا گیا، ذوالفقار بھٹو نے ملک کو ایٹمی قوت بنایا، آصف زرداری نے صوبوں کو حقوق دلائے، آج وفاق خطرے میں ہے اس لیے ہمیں غیر جمہوری قوتوں کا مقابلہ کرنا پڑے گا۔

چیئرمین پی پی نے مزید کہا کہ میں الیکشن کے وقت سے کہہ رہا ہوں کہ ہمیں وفاق کو بچانا ہوگا، غیر جمہوری قوتوں کی سازش کو ناکام بنانے کے لیے عوام کی ضرورت ہے، ایک سال سے کٹھ پتلی حکومت کے وار جاری ہیں، سندھ کو ایک سو ارب جبکہ پنجاب کو دو سو ارب سے زائد نقصان ہوا ہے، آئین کے مطابق صوبوں سے ناانصافی ہورہی ہے اور کٹھ پتلی سرکار صوبوں کے آئینی حقوق پر ڈاکہ ڈال رہی ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔