شامی فوج کی چیک پوسٹ پر خودکش حملہ ، فوجیوں سمیت 31 افراد ہلاک

دمشق: شام کے شہرحما ميں فوجی چیک پوسٹ پر خودکش حملے میں 31 افراد ہلاک اور متعدد زخمی ہو گئے۔

غیرملکی خبر ایجنسی کے مطابق خودکش حملہ آوور نے دھماکا خیز مواد سے بھرا ٹرک وسطی شہر حما میں قائم ایک فوجی چیک پوسٹ سے ٹکرا دیا جس کے نتیجے میں فوجیوں سمیت 31 افراد ہلاک اور درجنوں دیگر زخمی ہو گئے۔ شام ميں کام کرنے والی امدادی تنظیموں کا کہنا ہے کہ زخمی ہونے والے بیشتر افراد کی حالت تشویشناک ہے جس کی وجہ سے ہلاکتوں کی تعداد میں اضافے کا امکان ہے۔

واضح رہے کہ حما شہر کو شام ميں جاری خانہ جنگی کے دوران شامی افواج پر بہت کم حملے دیکھنے میں آئے ہیں جس کی وجہ سے اس شہر کو شام کا محفوظ اور مستحکم شہر تصور کیا جاتا ہے۔