زارا عباس نور کی علی ظفر کے ہمراہ نغمہ سرائی کی ویڈیو وائرل

 کراچی: فلم اور ڈرامہ اداکارہ زارا عباس نور کی علی ظفر کے ہمراہ گانے کی ویڈیو سوشل میڈیا پر وائرل ہوگئی۔

فلم ’چھلاوا‘ اور ’پرے ہٹ لو‘ میں اداکاری کے جوہر دکھانے والی زارا عباس نور اب تک بڑی اسکرین کے ساتھ ساتھ کئی مختلف ڈراموں میں بھی اداکاری کے ذریعے اپنا ایک خاص مقام بنا چکی ہیں۔ ان دنوں وہ آئی ایس پی آر کے تعاون سے بنائے گئے مقبول ڈرامے ’ عہد وفاء‘ میں بھی اہم کردار ادا کر رہی ہیں۔ اداکاری کی دنیا میں لوہا منوانے کے بعد اب زارا عباس نور نے گلوکاری کرکے سب کو حیران کر دیا ہے۔

فیس بک پر ایک ویڈیو وائرل ہو رہی ہے جس میں گلوکار علی ظفر کے ہمراہ زارا عباس نور گاتی نظر آرہی ہیں، انہوں نے گلوکاری کے فن کا مظاہرہ علی ظفر کے اسٹوڈیو میں انجام دیا ہے۔  ویڈیو میں زارا نور مشہور زمانہ گیت ’عجیب داستاں ہے یہ‘ گا رہی ہیں۔