آئی ایس آئی کے خلاف بھارتی مہم بے نقاب ہوگئی

اسلام آباد: اے آر وائی نیوز پر اپنے 25 اکتوبر 2013کے پروگرام میں میزبان مبشر لقمان نے ایک بڑے میڈیا گروپ کے حوالے سے حیران کن انکشافات کئے  ہیں۔

میزبان نے بھارتی اخبار ہندوستان ٹائمز کے پرنٹ اور ویب ایڈیشنز میں 29 ستمبر 2013 کو چھپنے والی ایک خبر کی مکمل تفصیلات اور پس منظر دیا ۔ اس گمراہ کن آرٹیکل کو لاکھوں افراد نے پڑھا ۔ ہندوستان ٹائمز میں چھپنے والے آرٹیکل میں پاکستان میں لانچ ہونیوالے ایک ٹی وی چینل کے حوالے سے  الزام لگایاگیا ہے کہ یہ چینل پاکستان کی خفیہ ایجنسی اور انڈر ورلڈ کے ارکان کے اشتراک سے شروع کیا جارہا ہے۔ آرٹیکل چھپنے کے بعد ہندوستان ٹائمز کو لیگل نوٹس بھیجا گیا جس پر انتظامیہ کی طرف سے تحقیقات کی گئی اور ایک وضاحتی بیان کیساتھ آرٹیکل ویب سائٹ سے ہٹا دیا گیا، تکلیف پر افسوس کا اظہار کیا گیا ۔ قارئین کی آگاہی اور تمام معاملے کا درست اور مکمل منظر دینے کیلئے خبر، وضاحت اور ہندوستان ٹائمز انتظامیہ کی اندرونی تحقیقات کی رپورٹ بغیر کسی ترمیم و تبدیلی کے پیش کی جارہی ہے۔