برطانوی بینڈ کا نئے البم میں امجد صابری کو خراج تحسین پیش کرنے کا اعلان

ویب ڈیسک  منگل 3 دسمبر 2019
البم میں امجد صابری کی آواز بھی شامل ہوگی (فوٹو : فائل )

البم میں امجد صابری کی آواز بھی شامل ہوگی (فوٹو : فائل )

 لندن: معروف برطانوی راک بینڈ ’کولڈ پلے‘ نے امجد صابری کے مشہور صوفیانہ کلام کو انہی کی آواز میں اپنی نئے آنے والے البم میں شامل کرکے خراج تحسین پیش کرنے کا اعلان کیا ہے۔

بین الاقوامی خبر رساں ادارے کے مطابق برطانیہ کے مشہور راک بینڈ ’کولڈ پلے‘ اپنے ایک نئے والی البم ’ایوری ڈے لائف‘ پر کام کر رہے ہیں جسے آئندہ برس ریلیز کیا جائے گا۔ اس البم کی خاص بات اس میں معروف قوال امجد صابری کا گایا ہوا صوفیانہ کلام شامل ہونا ہے۔

بینڈ سے تعلق رکھنے والے گلوکار کرس مارٹن نے میڈیا سے گفتگو میں انکشاف کیا کہ اس البم کے گانے میں دو اور گلوکاروں کی آوازیں بھی شامل ہیں جن میں سے ایک پاکستانی قوال امجد صابری ہیں، جنہیں بے دردی سے قتل کردیا گیا تھا۔

گلوکار کرس مارٹن نے مزید کہا کہ وہ امجد صابری کے مشہور کلام ’جگہ جی لگانے کی دنیا نہیں ہے‘ سے بہت متاثر ہوئے ہیں اور اسی تھیم کو اپنے البم کے ایک گانے ’ فِل تھرو دا اسکائی‘ میں بھی شامل کیا ہے۔

موسیقار خانوادے سے تعلق رکھنے والے عالمی شہرت یافتہ قوال امجد صابری کے مداح دنیا بھر میں پھیلے ہوئے ہیں، ان کی قوالیاں زبان زد عام ہیں اور کئی عالمی شہرت یافتہ گلوکار و موسیقار اس گھرانے کے نیاز مند ہیں۔ امجد صابری کو 22 جون 2016ء میں گولیاں مار کر شہید کردیا گیا تھا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔