فن لینڈ کی سنا مارین دنیا کی کم عمر ترین وزیراعظم منتخب

ہیلسینکی: فن لینڈ میں نومنتخب وزیراعظم 34 سالہ سنا مارین نے دنیا کی کم عمر ترین وزیراعظم ہونے کا اعزاز بھی حاصل کرلیا ہے۔

بین الاقوامی خبر رساں ادارے کے مطابق فن لینڈ میں وزیراعظم آنتی رائے کے مستعفی ہونے کے بعد حکمراں جماعت سوشل ڈیموکریٹک پارٹی نے کابینہ کی رکن  سنا مارین کو وزیر اعظم نامزد کردیا ہے، اتحادی جماعتوں کی حمایت کے بعد ان کا انتخاب عمل میں آگیا ہے اور اس ہفتے اپنے عہدے کا حلف اُٹھا لیں گی۔

34 سالہ سنا مارین اگر عہدے کا حلف اُٹھالیتی ہیں تو وہ دنیا کی سب سے کم عمر وزیراعظم بن جائیں گی اور اپنے وطن کی وہ تیسری خاتون وزیراعظم ہوں گی۔ اس وقت دنیا کی سب کم عمر خاتون وزیراعظم کا اعزاز نیوزی لینڈ کی وزیراعظم جیسِنڈا آرڈرن (39 سال) اور مردوں میں یوکرین کے وزیرِ اعظم اولیکسی ہونچاروک (35 سال) کے پاس ہے۔

سنا مارین اس سے قبل وزیر ٹرانسپورٹ کی ذمہ داریاں نبھا رہی تھیں، اپریل میں ہونے والے انتخابات میں سنا مارین کی پارٹی سب سے بڑی جماعت ثابت ہوئی تھی تاہم حکومت میں 4 اتحادی جماعتوں کو شامل کیا گیا تھا اس طرح کابینہ پانچ جماعتی اتحاد پر مشتمل ہے اور دلچسپ بات یہ ہے کہ ان پانچوں جماعتوں کی سربراہاں خواتین ہی ہیں۔

Finland’s government is now led by these five party leaders. #newgeneration pic.twitter.com/vis0qB9tO8

— Tuomas Niskakangas (@TNiskakangas) December 8, 2019

قبل ازیں سابق وزیراعظم آنتی رائے کو ملک میں ہونے والی ڈاک ہڑتال پر قابو پالینے کے طریقہ کار پر پانچ میں سے ایک اتحادی جماعت کا اعتماد کھو دیا تھا جس کے باعث انہیں اپنے عہدے سے سبکدوش ہونا پڑا تھا۔