کوالالمپورکانفرنس میں عدم شرکت کی وجہ بڑے مسلم ممالک کے تحفظات تھے، دفترخارجہ

ویب ڈیسک  ہفتہ 21 دسمبر 2019
گزشتہ روز امریکا بھارت مذاکرات کے بعد جاری ہونے والے بیان کو پاکستان مسترد کرتا ہے، ترجمان دفترخارجہ۔ فوٹو:فائل

گزشتہ روز امریکا بھارت مذاکرات کے بعد جاری ہونے والے بیان کو پاکستان مسترد کرتا ہے، ترجمان دفترخارجہ۔ فوٹو:فائل

 اسلام آباد: دفترخارجہ کا کہنا ہے کہ بڑے مسلم ممالک کے تحفظات کے باعث کوالالمپور سمٹ میں حصہ نہیں لیا۔

دفترخارجہ کی جانب سے جاری ہونے والے بیان میں کہا گیا ہے کہ پاکستان نے کوالالمپور سمٹ میں حصہ نہیں لیا کیوں کہ اس سمٹ پر بڑے مسلم ممالک کو تحفظات تھے اور یہ تحفظات مسلم امہ میں تقسیم کے حوالے سے خدشات پر مبنی تھے، ان تحفظات کو دور کرنے کے لیے وقت اورکوششوں کی ضرورت ہے۔

ترجمان دفترخارجہ عائشہ فاروقی کا کہنا ہے کہ پاکستان امہ میں اتحاد اور یکجہتی چاہتا ہے جس کے لئے کام کرتا رہے گا، مسلم دنیا کو درپیش چیلنجز کو مؤثر طریقے سے حل کرنا ناگزیر ہے۔

ترجمان دفترخارجہ کے مطابق گزشتہ روز امریکا بھارت مذاکرات کے بعد جاری ہونے والے بیان کو پاکستان مسترد کرتا ہے، پاکستان سے متعلق بھارتی وزیر دفاع و وزیرخارجہ کے دعوے لغو اور بے بنیاد ہیں جس کی مذمت کرتے ہیں، واشنگٹن کو امریکا بھارت مشترکہ بیان پر نا پسندیدگی سے آگاہ کردیا گیا ہے۔

عائشہ فاروقی کا کہنا تھا کہ مقبوضہ کشمیر میں انسانی حقوق کی صورتحال خطے کے امن کے لیے خطرہ ہے، عالمی برادری دہشت گردی کے خلاف جنگ میں پاکستان کی قربانیوں کوتسلیم کرتی ہے۔

 

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔