عمران خان اپنی اہلیہ پر تنقید کرنے والوں پر برس پڑے

 اسلام آباد:  وزیراعظم عمران خان اپنی اہلیہ بشریٰ بی بی پر تنقید کرنے والوں پر برس پڑے۔

تین روز قبل سوشل میڈیا نمائندوں سے گفتگو کرتے ہوئے وزیراعظم عمران خان نے کہا کہ سوشل میڈیا کو ایک بات کہوں گا کہ کبھی کسی کو نجی سطح پر گرنے کی اجازت نہ دیں ،کسی کی فیملی کو آڑے ہاتھو ں لینا ہماری روایات کا حصہ نہیں۔

ان کا کہنا تھا کہ میں نے کبھی اس طرح لوگوں کو گرتے ہوئے نہیں دیکھا جیسے کچھ لوگوں نے بشریٰ بی بی پر ذاتی حملے کیے، بشریٰ بیگم نہ تو سیاست میں ہیں ،نہ پبلک فگر ہیں اور نہ ہی وہ کبھی سامنے آتی ہیں۔

عمران خان نے کہا کہ مریم صفدر کی بات تو یہ ہے کہ وہ خود سوشل میڈیا سیل چلاتی ہیں اور سیاست میں بھی ہیں مگر ہماری پارٹی میں سے کسی نے بھی کبھی کلثوم نواز کے خلاف ایک لفظ بھی نہیں کہا ۔