امریکی شہر ہوسٹن میں زوردار دھماکا، آگ کے شعلے آسمان کو چھونے لگے

ہوسٹن: امریکی ریاست ٹیکساس میں زوردار دھماکا ہوا ہے جس کے نتیجے میں جائے وقوعہ پرخوفناک  آگ بھڑک اُٹھی اور شعلے آسمان کو چھونے لگے۔

بین الاقوامی خبر رساں ادارے کے مطابق امریکی شہر ہوسٹن کے شمالی علاقے میں زوردار دھماکے سے شہر گونج اُٹھا، دھماکا اتنا شدید تھا کہ آس پاس کی عمارتوں کے کھڑکیوں کے شیشے اور دروازے تک ٹوٹ گئے جب کہ پارکنگ میں کھڑی گاڑیوں کو بھی نقصان پہنچا۔

pic.twitter.com/JgfP7V1O87

— Joey Charpentier (@BattleNub19) January 24, 2020

عینی شاہدین کا کہنا ہے کہ دھماکے کی جگہ پر فوراً آگ بھڑک اُٹھی اور فلک کو چھونے والے شعلے دور ہی سے دکھائی دے رہے تھے۔ ریسکیو ادارے اہلکاروں اور فائر بریگیڈ کی گاڑیوں کو جائے حادثہ پر جاتے ہوئے دیکھا گیا ہے جب کہ پولیس نے علاقے کا گھیراؤ کرلیا ہے۔

دھماکے کی نوعیت کا تعین نہیں ہو سکا ہے تاہم واسٹن گرینڈنگ اینڈ مینوفیکچرنگ کمپنی نے اپنی ویب سائٹ پر انکشاف کیا ہے کہ دھماکا ان کی فیکٹری میں ہوا ہے جہاں مشینوں کے پرزہ جات بنائے جاتے ہیں۔

غالب امکان ہے کہ دھماکا فیکٹری میں موجود کیمیکل پروپائلین کے ٹینک میں ہوا، یہ آتش گیر کیمیکل ہے جو فوراً آگ پکڑ لیتی ہے، یہی وجہ ہے کہ دھماکے کے بعد خوفناک آگ بھڑک اُٹھی ہے۔ تاحال صرف ایک زخمی کو اسپتال لایا گیا ہے۔