چین کے پُراسرار وائرس کا یورپ میں بھی داخل ہونے کا قوی امکان

ویب ڈیسک  ہفتہ 25 جنوری 2020
چین میں وائرس سے متاثرہ افراد کی تعداد 1 ہزار اور ہلاک ہونے والوں کی تعداد 46 ہوگئی ہے (فوٹو : فائل)

چین میں وائرس سے متاثرہ افراد کی تعداد 1 ہزار اور ہلاک ہونے والوں کی تعداد 46 ہوگئی ہے (فوٹو : فائل)

بیجنگ: چین میں ہلاکت خیزی پھیلانے والا پُراسرار وائرس امریکا اور آسٹریلیا کے بعد اب یورپ میں داخل ہوسکتا ہے۔

عالمی خبر رساں ادارے کے مطابق جہاں چین میں ہر قسم کی تدابیر اور احتیاط کے باوجود ’کرونا وائرس‘ سے ہونے والی ہلاکتیں 26  ہوگئی ہیں وہیں اس پُراسرار وائرس کے دیگر ممالک میں داخل ہونے کے امکانات بھی کافی روشن ہوگئے ہیں۔ امریکا میں اس وائرس سے متاثرہ دوسرے مریض کی تصدیق ہوگئی ہے۔

اقوام متحدہ، عالمی ادارہ صحت سمیت عالمی قیادت نے بھی اس وائرس کے بڑھتے ہوئے خطرات پر تشویش کا اظہار کرتے ہوئے احتیاطی اقدامات اُٹھانے پر زور دیا ہے۔ حکومتیں لوگوں میں آگاہی پھیلائیں اور طبی ماہرین اس کا توڑ ڈھونڈنے میں اپنی صلاحیتوں کو بروئے کار لائیں۔

یہ خبر پڑھیں : کرونا وائرس ہے کیا؟ 10 بنیادی سوالات کے جوابات

دوسری جانب امریکا اور آسٹریلیا میں بالترتیب دو اور ایک مریض میں کرونا وائرس جیسی علامتیں پائے جانے کے بعد اب ماہرین کا کہنا ہے کہ یورپ میں بھی اس خطرناک وائرس کے داخل ہونے کے امکانات 70 فیصد ہیں اور متاثرہ ممالک میں جرمنی اور برطانیہ ہوسکتے ہیں۔

ادھر دیگر ممالک نے بھی وائرس کے پھیلاؤ کو روکنے کے لیے ایئرپورٹس اسکریننگ کیمپ قائم کرنے کا فیصلہ کیا ہے جب کہ پاکستان نے پہلے ہی اپنے چار بڑے ہوائی اڈوں پر مسافروں کی اسکریننگ کا آغاز کر دیا ہے۔ چین نے ایک ہفتے کے دوران ایسے اسپتال کے قیام کا علان کیا ہے جس میں صرف کرونا وائرس کا علاج کیا جا سکے گا۔

یہ پڑھیں : چین میں کروناوائرس سےمزید8 افرادہلاک،ہلاکتوں کی تعداد 25 ہوگئی

واضح رہے کہ چین کے شہر ووہان سے شروع ہونے والے سارس قسم کے ایک نئے وائرس کرونا نے چین میں تباہی مچادی ہے اور اب یہ خطرہ ایک علاقے سے نکل کر عالمگیر صورت اختیار کرتا جا رہا ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔