کھانے کے ٹکڑے پر لڑتے دو چوہوں کی تصویر کے لیے بہترین فوٹو کا ایوارڈ

ویب ڈیسک  جمعرات 13 فروری 2020
اس تصویر میں دو چوہے کھانے کے ٹکڑے پر جھگڑ رہے ہیں اور اسے بہترین تصویر کا اعزاز دیا گیا ہے (فوٹو: نیوسائنٹسٹ)

اس تصویر میں دو چوہے کھانے کے ٹکڑے پر جھگڑ رہے ہیں اور اسے بہترین تصویر کا اعزاز دیا گیا ہے (فوٹو: نیوسائنٹسٹ)

 لندن: رواں سال جانوروں کے تصاویری مقابلے میں ایک انوکھی اور بالکل مختلف تصویر کو ایوارڈ دیا گیا جس میں دو چوہوں کے درمیان کھانے کی کسی شے پر تکرار اور چھینا جھپٹی دیکھی جاسکتی ہے۔

اس تصویر کو دنیا بھر کے ناظرین نے خاص ووٹ دیا ہے اور اسے لیومکس پیپلز چوائس ایوارڈ سے نوازا گیا ہے۔ اسٹیشن اسکویبل نامی اس تصویر میں ریلوے پلیٹ فارم پر کسی مسافر کے ہاتھ سے گری ہوئی شے پر دو چوہے باہم دست وگریباں ہیں۔ ایسے مناظر ہر روز پیش آتے ہیں لیکن اسے فلمبند کرنے میں فوٹوگرافر سیم رولی نے پانچ راتیں مسلسل جاگ کر گزاری ہیں۔

ان کی تصویر کو 28 ہزار افراد نے بہترین فوٹو گراف کا ووٹ دیا ہے جس میں دھیمی روشنی میں رات کے سناٹے میں دو چوہے دیکھے جاسکتے ہیں۔ یہ اسٹیشن مرکزی لندن میں واقع ہے۔ سیم نے بتایا کہ وہ بی بی سی کی نیچرل ہسٹری عکس بندی کے شعبے سے وابستہ ہیں اور شہری زندگی اور جنگلی حیات ان کا پسندیدہ موضوع ہے۔

انہوں نے بتایا کہ یہ چوہے سورج کی روشنی نہیں دیکھتے اور ایک یا دو برس میں مرجاتے ہیں کیونکہ ان کے کھانے کے لیے کچھ نہیں ہوتا اور چوہوں کی تعداد زیادہ ہونے سے سخت مقابلے کی صورتحال ہوتی ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔