ویلنٹائن ڈے ؛ بھارت میں طالبات سے کبھی ’محبت نہ کرنے‘ کا عہد لینے کی ویڈیو وائرل

نئی دلی: بھارت میں مقامی کالج کی طالبات سے کبھی ’محبت نہ کرنے‘ اور والدین کی رضامندی کے بغیر شادی نہ کرنے کا عہد لیا گیا ہے جس کی ویڈیو سوشل میڈیا پر وائرل ہوگئی۔

دنیا بھر میں آج ویلنٹائن ڈے منایا جا رہا ہے، اس دن ایک دوسرے کی محبت میں گرفتار جوڑے پھولوں اور تحائف کا تبادلہ کرتے ہیں اور عہد وفا کی تجدید کرتے ہیں۔ اس حوالے سے بھارتی ریاست مہاراشٹر کے شہر امراوتی کے ایک کالج میں اپنی نوعیت کی ایک انوکھی تقریب منعقد کی گئی۔

یوم محبت کی منابت سے منعقد کردہ تقریب میں کالج کے ایک پروفیسر نے طالبات سے ایک انوکھا عہد لیا جس میں طالبات سے ’ محبت نہ کرنے‘ اور والدین کی مرضی کے بغیر شادی نہ کرنے کی تلقین کی گئی ہے جس کی ویڈیو وائرل ہوگئی۔

students from a girls college forced to take an absurd pledge in Amravati on Valentine's Day. The students are forced to pledge saying we will not love anyone and will never have a love marriage @Pankajamunde @news24tvchannel @VarshaEGaikwad @ChitraKWagh @meudaysamant pic.twitter.com/by8mV1wPgM

— Vinod Jagdale (@vinodjagdale80) February 14, 2020

سماجی رابطے کی ویب سائٹس پر طالبات سے عہد لینے کی وائرل ہونے والی ویڈیو میں دیکھا جا سکتا ہے کہ ایک استاد طالبات سے عہد لے رہے ہیں اور طالبات استاد کے جملوں کو ساتھ ساتھ دہرا رہی ہیں کہ وہ پسند کی شادی کرکے کبھی والدین کو پریشانی کا سامنا نہیں کرنے دیں گی۔

سوشل میڈیا پر وائرل ہونے والی اس ویڈیو پر کالج انتطامیہ کو تنقید کا نشانہ بنایا گیا ہے، اکثر صارفین کا کہنا تھا کہ پسند کی شادی کرنا یا لائف پارٹنر کے انتخاب میں اپنی رائے دینا چوری یا ڈکیتی نہیں جس کے نہ کرنے کا عہد لیا جارہا ہے تاہم کچھ صارفین نے اساتذہ کے اقدام کو سراہا بھی ہے۔