صدر اردوان کی لیبیا میں 2 ترک فوجیوں کی ہلاکت کی تصدیق

ویب ڈیسک  منگل 25 فروری 2020
ترک فوجی لیبیا میں اقوام متحدہ کی حمایت یافتہ حکومت کے تحفظ کیلیے تعینات ہے، فوٹو : فائل

ترک فوجی لیبیا میں اقوام متحدہ کی حمایت یافتہ حکومت کے تحفظ کیلیے تعینات ہے، فوٹو : فائل

 انقرہ: سیاسی بحران کے شکار ليبيا ميں حکومت مخالف مسلح باغی گروہ سے جھڑپ کے دوران ترک فوج کے 2 اہلکار ہلاک ہوگئے۔

عالمی خبر رساں ادارے کے مطابق ترک صدر طیب اردوان نے آذربائیجان روانگی سے قبل ایئرپورٹ پر میڈیا سے گفتگو میں لیبیا میں دو ترک فوجیوں کی ہلاکت کی تصدیق کرتے ہوئے بتایا کہ ترک فوجی عالمی امن اور استحکام کی خاطر اپنی جان کی بازی لگانے بھی گریز نہیں کر رہے ہیں۔ دنیا میں قیام امن کیلیے ہر قسم کی قربانیاں دینے کو تیار ہیں۔

قبل ازیں ترک صدر رجب طيب اردوان نے اپنے ایک بیان میں لیبیا میں ترک فوجیوں کی ہلاکت کا دعویٰ کیا تھا تاہم انہوں نے ہلاک ہونے والے فوجیوں کی تعداد کے حوالے سے کچھ نہیں بتایا تھا جس پر ترک صدر کو شدید تنقید کا نشانہ بنایا گیا تھا جس کے بعد آج ہلاک شدگان کی تعداد بتادی گئی ہے تاہم اب بھی فوجیوں کی شناخت ظاہر نہیں کی گئی۔

واضح رہے کہ ترکی نے ایک معاہدے کے تحت ليبيا ميں اقوام متحدہ کی حمايت يافتہ حکومت کی مدد کے ليے اپنے فوجی دستے بھيجے ہيں تاہم باغیوں پر تاحال قابو نہیں پایا جا سکا ہے اور سیاسی افراتفری کے شکار ملک میں امن و امان کی حالت نہایت مخدوش ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔