امریکا میں کورونا سے بچاؤ کیلیے ملیریا کی دوا کھانے والا شخص ہلاک

ویب ڈیسک  منگل 24 مارچ 2020
امریکی جوڑے نے مسلسل ملیریا کی دوا لی جس کی وجہ سے شوہر ہلاک اور اہلیہ کی حالت تشوشناک ہے، فوٹو : فائل

امریکی جوڑے نے مسلسل ملیریا کی دوا لی جس کی وجہ سے شوہر ہلاک اور اہلیہ کی حالت تشوشناک ہے، فوٹو : فائل

ایری زونا: صدر ٹرمپ کی جانب سے ملیریا کی دوا کلورو کوئین فاسفیٹ کے کورونا وائرس کے علاج میں بہترین ثابت ہونے کے دعوے پر امریکی جوڑے نے یہ دوا استعمال کرلی جس کے نتیجے میں شوہر ہلاک ہوگیا جب کہ اہلیہ تشویشناک حالت میں زیر علاج ہیں۔

عالمی خبر رساں ادارے کے مطابق امریکی ریاست ایری زونا کے شہر فینکس کے ایک جوڑے نے خود کو کورونا سے بچانے کے لیے ملیریا کے علاج کے لیے استعمال ہونے والی معروف دوا کلوروکوئین فاسفیٹ کا بے جا اور مسلسل استعمال کیا۔

کسی مستند ڈاکٹر کے مشورے کے بغیر ملیریا کی دوا مسلسل لینے کی وجہ سے جوڑے کو حالت بگڑ گئی اور دونوں کو تشویشناک حالت میں اسپتال لایا گیا جہاں شوہر کی موت کی تصدیق کر دی گئی ہے جب کہ اہلیہ نازک حالت میں انتہائی نگہداشت کے وارڈ میں زیرعلاج ہیں۔

یہ خبر پڑھیں : کیا کورونا وائرس کا علاج 70 سال پرانی دوا سے ممکن ہے!

چند روز قبل امریکی صدر ٹرمپ نے میڈیا سے گفتگو میں ملیریا کے لیے استعمال ہونے والی دوا کلورو کوئین فاسفیٹ کے کورونا وائرس کے علاج میں بہترین دوا ثابت ہونے کا دعویٰ کیا تھا جس کے بعد دنیا بھر میں اس دوا کی طلب میں اضافہ ہوا تھا۔

واضح رہے کہ عالمی ادارہ صحت کی جانب سے تاحال کلورو کوئین فاسفیٹ کو تاحال کورونا کے علاج کے لیے تجویز نہیں کیا ہے جب کہ ماہرین نے بھی اس دوا کو ڈاکٹر کے مشورے بغیر استعمال نہ کرنے کی ہدایت کی ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔