حکومت پنجاب کا تعلیمی کورس کتابوں کے بجائے”آئی پیڈز“ پر منتقل کرنے کا فیصلہ

لاہور: پنجاب حکومت نے تعلیم کے شعبے میں تبدیلی لانے کیلئے صوبے میں ’’اسمارٹ اسکول سسٹم‘‘ متعارف کرانے کا فیصلہ کیا ہے جس کے تحت سرکاری اسکولوں کا تعلیمی کورس کتابوں کے بجائے”آئی پیڈز“ پر منتقل کردیا جائے گا۔

پنجاب کے وزیر تعلیم رانا مشہود کا کہنا ہے کہ صوبائی حکومت کی جانب سے اگلے سال صوبے کے سرکاری اسکولوں میں اسمارٹ اسکول سسٹم کے تحت 12 لاکھ طالب علموں کو کمپیوٹر ٹیبلٹ فراہم کر دیئےجائیں گے تاکہ وہ کورس کو ان ٹیبلٹ پر ڈاؤن لوڈ کریں اور انہیں بھاری بھرکم بستوں سے نجات مل سکے۔

صوبائی وزیر تعلیم کا کہنا تھا کہ صوبے کے ہر اسمارٹ اسکول کے کمپیوٹرز کو ڈیجیٹل لائبریری سے منسلک کیا جائےگا جس سے سرکاری اسکولوں میں پڑھنے والے بچوں کو جدید ترین علوم مفت حاصل ہو سکے گا اور یکساں تعلیمی نظام سامنے آئےگا۔