حکمرانوں کا وعدہ ہی کیا جو وفا ہوجائے؛ 2017 تک لوڈ شیڈنگ کے خاتمے کاکوئی امکان نہیں

اسلام آباد: مسلم لیگ (ن) نے اپنی انتخابی مہم میں 2 سال میں لوڈ شیدنگ کے خاتمے کا وعدہ کیا تھا لیکن وہ وعدہ ہی کیا جو وفا ہوجائے کے مقولے پر عمل کرتے ہوئے اب حکمران یہ کہہ رہے کہ آئندہ 4 سال میں بھی لوڈ شیڈنگ کا عذاب ختم نہیں ہوسکتا جس کا اعتراف وزیر مملکت پانی و بجلی عابد شیر علی نے کرلیا ہے۔

گزشتہ عام انتخابات میں ہر سیاسی جماعت نے عوامی مسائل کے حل کے لئے بلند و بانگ دعوے کئے لیکن طرح طرح کے بیانات دے ڈالے یہاں تک کہ میاں شہباز شریف نے تو 2 سال میں لوڈ شیڈنگ کا مسئلہ حل نہ ہونے پر اپنا نام ہی بدل ڈالنے کا اعلان کردیا لیکن جب حکومت میں آئے تو انہیں پتہ چلا کے سو میں کنے بیس ہوتے ہیں ، حالات کی سنگینی دیکھ کر تیسری بار  وزیر اعظم  منتخب ہونے والے نواز شریف نے اپنے چھوٹے بھائی کے اس بیان کو جوش خطابت قرار دے دیا اور ان کو نام کی تبدیلی کی خفت سے بچانے کے لئے چھوٹے شریف کو وزارت بجلی وپانی کے قلمدان سے سرفراز نہ کیا، اس کے علاوہ انہوں نے ساتھ ہی ساتھ یہ بھی کہہ ڈالا حالات کو ان کے اندازے سے بھی زیادہ خراب ہیں وہ کوشش کریں گے کہ جلد از جلد اس مسئلے پر قابو پالیا جائے۔ لیکن اب ان کے ایک اور وزیر موصوف نے یہ بھی اعتراف کرلیا ہے لوڈ شیڈنگ کا خاتمہ  2017 تک ممکن ہی نہیں۔

اپنی شعلہ بیانیوں کی وجہ سے وزیر اعظم نے عابد شیر علی کو وزیر مملکت برائے پانی و بجلی کے قلمدان سے سرفراز کیا اور اس عہدے کے زعم پر وہ ملک بھر میں اپنے طوفانی دورے کرتے ہیں اور شعلہ بیانی سے آگ لگاتے ہیں لیکن کاش سائنسدان ایسی بھی کوئی ٹیکنالوجی ایجاد کرتے جس سے منہ کے بموں سے بجلی بنائی جاسکتی تو انہیں وہ نہ کہنا پڑتا جو اب کہہ رہے ہیں، اسلام آباد میں ایک تقریب سے خطاب کے دوران موصوف نے جو کہا وہ تو ہم سنتے ہی رہتے ہیں یعنی ملک کو توانائی کے بدترین بحران کا سامنا ہے جس پر قابو پانے کے لئے اقدامات کر رہے ہیں، آگے کی بات بھی وہی ہے کہ توانائی بحران پر قابو پانے کے لئے خصوصی انرجی پارکس اور نئے ہائیڈل پراجیکٹ شروع کررہے ہیں۔ یہ تمام باتیں تو عوام کے لئے نئی نہیں، آگے جو بات انہوں نے کی وہ سگریٹ کے پیکٹ میں بیڑی والی بات ہی ہے، کہتے ہیں کہ لوڈ شیڈنگ کا خاتمہ 2017 میں ہوگا یعنی عوام کو یہ مژدہ ضرور سنایا جارہا ہے کہ اب لوڈ شیڈنگ ملک کی زندگی کے مزید چار برس کو اندھیروں میں بدل دے گی۔

موجودہ حکمران 7 ماہ کے دوران لوڈشیڈنگ کے خاتمے کے وقت کو 2 سال سے بڑھا کر 4 برسوں پر تو لے آئے کہیں ایسا نہ ہو کہ 2018 کے انتخابات میں ایک بار پھر یہی لوگ عوام سے ایک اور وعدہ کریں کہ لوڈ شیڈنگ کا خاتمہ بس چند ہی قدم دور ہے ہمیں ووٹ دیں وعدہ کرتے ہیں کہ اس بار ضرور کامیاب ہوجائیں گے کیونکہ وہ وعدہ ہی کیا جو وفا ہوجائے۔