غیر ملکی ڈرامے پاکستانی پروڈکشن کو تباہ کردیں گے، فواد چوہدری

 اسلام آباد: وفاقی وزیر سائنس و ٹیکنالوجی فواد چوہدری نے کہا ہے کہ ارطغرل زبردست ڈرامہ ہے، تاہم غیر ملکی ڈرامے پاکستانی پروڈکشن کو تباہ کردیں گے۔

فواد چوہدری نے ٹوئٹر پر پاکستان ٹیلی وژن نیٹ ورک (پی ٹی وی ہوم) پر حیرت کا اظہار کیا کہ وہ دوسرے ممالک کی پروڈکشنز پر فخر جتارہا ہے، حالانکہ اسے پاکستانی پروڈکشن پر توجہ دینی ہوگی، ورنہ غیر ملکی ڈرامے ہماری پروڈکشن کو برباد کر دیں گے۔

فواد چوہدری نے کہا کہ غیر ملکی ڈراموں کو درآمد کرنا ہمیشہ سستا ہوتا ہے لیکن اس سے ہماری اپنی پروگرامنگ پر دور رس تباہ کن اثرات مرتب ہوں گے۔ فواد چوہدری کے اس بیان کی اداکار فخر عالم نے بھی تائید کی اور ان کے موقف کو جرات مندانہ قرار دیتے ہوئے سراہا۔

فواد چوہدری کے اس بیان پر ایک صارف نے تبصرہ کیا کہ تو پھر پی ٹی وی کو ارطغرل غازی جیسا کوئی ڈرامہ بنانے دیں، کیا وہ یہ بناسکتا ہے؟۔ اس پر فواد چوہدری نے جواب دیا ضرور کیوں نہیں۔

Surprised on @PTVHomeOfficial taking pride on other countries productions,you guys must focus on Pak productions otherwise foreign dramas ll ruin Pak productions,its always cheap to import foreign dramas but this ll have devastating long term effect on our own programming

— Ch Fawad Hussain (@fawadchaudhry) May 31, 2020

ایک صارف نے فواد چوہدری کی ہی ارطغرل کی تعریفوں پر مبنی ایک پرانی ٹوئٹ شیئر کرتے ہوئے کہا کہ ابھی چند دن پہلے کی بات ہے آپ ارطغرل کی مثالیں دے رہے تھے۔

اس پر فواد چوہدری نے جواب دیا کہ ارطغرل زبردست ڈرامہ ہے میں نے ارطغرل کی تو بات ہی نہیں کی۔ وزیر موصوف نے کہا کہ میرا ہمیشہ یہ موقف رہا ہے کہ آپ غیرملکی ڈرامہ چلائیں لیکن اس پر اتنا ٹیکس لگائیں کہ اس سے ہمارا مقامی ڈرامہ متاثر نہ ہو، کیونکہ اگر تمام ٹی وی چینلز باہر سے سستے ڈرامے خرید لیں گے تو ہماری تو پوری انڈسٹری ہی بیٹھ جائیگی۔