پاک فوج نے بھارت کا ایک اور جاسوس ڈرون مار گرایا

ویب ڈیسک  جمعـء 5 جون 2020
رواں برس پاک فوج نے لائن آف کنٹرول عبور کرنے والا یہ آٹھواں بھارتی جاسوس ڈرون گرایا ہے۔ فوٹو، آئی ایس پی آر

رواں برس پاک فوج نے لائن آف کنٹرول عبور کرنے والا یہ آٹھواں بھارتی جاسوس ڈرون گرایا ہے۔ فوٹو، آئی ایس پی آر

 اسلام آباد: پاک فوج نے سرحدی خلاف ورزی کرنے والا بھارت کا ایک اور جاسوس ڈرون مار گرایا ہے۔

فوج کے شعبہ تعلقات عامہ کے مطابق بھارتی جاسوس ڈرون لائن آف کنٹرول عبور کرکے پاکستان کی سرحد میں 500 میٹر اندر تک آگیا تھا جہاں خنجر سیکٹر میں اسے مار گرایا گیا۔

آئی ایس پی آر کے مطابق رواں برس پاک فوج نے بھارت کا یہ آٹھواں ڈرون مارگرایا ہے اس سے قبل گزشتہ ماہ بھی بھارتی جاسوس کواڈ کاپٹر کی سرحدی خلاف وزریوں کا سلسلہ جاری رہا جس کے جواب میں پاکستان نے ایک ہفتے کے دوران دو جاسوس ڈرون مار گرائے تھے۔

29 مئی کو پاک فوج کے بھارتی ڈرون گرانے کے بعد وزیر خارجہ شاہ محمود قریشی نے کہا تھا کہ لداخ میں بھی بھارت ناکام ہوا ہے اور کشمیرمیں اس کی پالیسی کو ناکامیوں کا سامنا ہے، اندرونی معاملات سے بچنے کے لیے بھارت یہ سب کررہا ہے، نریندرمودی کی پالیسی فیل ہوچکی ہے اورآج بھارتی میڈیا بھی اپنی حکومت کی پالیسیوں پر تنقید کررہا ہے۔

وزیر خارجہ کے مطابق وہاں اب یہ رپورٹس آنے لگی ہیں کہ بھارتی قومی سلامتی کے مشیر اجید دووال  کی پالیسی سے بھارتی فوج مطمئن نہیں، بھارتی فوج سمجھتی ہے کہ بھارت سرکار ایسا راستہ اپنا رہی ہے جو اسے بند گلی کی طرف لے جارہا ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔