فیڈرل کالجز میں کل سے آن لائن ڈگری کلاسز شروع کرنے کا فیصلہ

ضیغم نقوی  پير 6 جولائ 2020
آن لائن کلاسوں کے دوران انٹرنیٹ معطل ہونے سے تدریس کا عمل متاثر ہو گا ،کالج بلا کر لیکچر ریکارڈ کر لیے جائیں،اساتذہ۔ فوٹو: فائل

آن لائن کلاسوں کے دوران انٹرنیٹ معطل ہونے سے تدریس کا عمل متاثر ہو گا ،کالج بلا کر لیکچر ریکارڈ کر لیے جائیں،اساتذہ۔ فوٹو: فائل

اسلام آباد: وفاقی نظامت تعلیمات کے زیر انتظام کالجز میں کل(7جولائی) سے آن لائن ڈگری کلاسز شروع کرنے کا فیصلہ کیا گیا ہے۔

وفاقی وزارت تعلیم کے ذیلی ادارے وفاقی نظامت تعلیمات کے زیر انتظام کالجز میں کل(7جولائی) سے آن لائن ڈگری کلاسز شروع کرنے کا فیصلہ کیا گیا ہے، بی ایس اور پوسٹ گریجویٹ ڈگری پروگرامز کے اساتذہ کو آن لائن کلاسیں پڑھانے کی ہدایات جاری کردی گئی ہیں تاہم اس سلسلے میں انہیں باقاعدہ تربیت نہیںدی گئی نہ تمام اساتذہ کو گھروں میں لیپ ٹاپ اور بلا تعطل انٹر نیٹ کی سہولت میسر ہے لہذا آن لائن کلاسیں پڑھانے کیلئے اساتذہ کو مشکلات کا سامنا کرنا پڑ سکتا ہے۔

کالجز نے اپنی مدد آپ کے تحت ڈگری کلاسز کیلیے لیکچررز اور پروفیسرز کو آگاہی دیدی ہے۔اساتذہ کا کہنا ہے کہ انھیں کالجز میں بلا کر لیکچر ریکارڈ کر لیے جائیں ،ان کے لئے بغیرتربیت اور وائٹ بورڈ کے استعمال پڑھانا مشکل ہو گا۔ ہم کلاس رومز میں بچوں کو وائٹ بورڈ پر پڑھانے کے عادی ہیں، اپنے گھروں پر ہم کس طرح طلبا کو وائٹ بورڈ پر آن لائن پڑھا سکیں گے ،آن لائن تدریس کا  ہمیں کوئی تجربہ ہی نہیں۔

 

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔