کورونا وبا؛ پاکستان میں فعال کیسز کی تعداد گھٹ کر 50 ہزار کی سطح پر آگئی

ویب ڈیسک  جمعرات 23 جولائ 2020
گزشتہ 24 گھنٹوں میں 1763 افراد میں کورونا کی تشخیص ہوئی ہے فوٹو: فائل

گزشتہ 24 گھنٹوں میں 1763 افراد میں کورونا کی تشخیص ہوئی ہے فوٹو: فائل

 اسلام آباد: پاکستان میں کورونا کیسز کی تعداد تیزی سے کم ہو رہی ہے اور اب ملک بھر میں اس وائرس کے مصدقہ مریضوں کی تعداد گھٹ کر 50 ہزار کی سطح پر آگئی ہے۔

نیشنل کمانڈ اینڈ آپریشن سینٹر کے مطابق 24 گھنٹوں میں ملک بھر میں کورونا کے 22 ہزار 408 ٹیسٹ کئے گئے۔ سندھ میں 10 ہزار سے زائد ٹیسٹ کئے گئے۔ پنجاب میں 7085، خیبر پختونخوا میں 2108 ، اسلام آباد میں 2355، بلوچستان میں 231 ، گلگت بلتستان میں 54 اور آزاد کشمیر میں 467 ٹیسٹ کئے گئے۔ ملک بھر میں مجموعی طور پر کورونا کے 17 لاکھ 99 ہزار 290 ٹیسٹ کیے جا چکے ہیں۔

گزشتہ 24 گھنٹوں میں ایک ہزار 763 افراد میں کورونا کی تشخیص ہوئی اس طرح ملک میں کورونا کے مصدقہ مریضوں کی مجموعی تعداد 2 لاکھ 69 ہزار 190 ہوئی ہے۔ جن میں سے 2 لاکھ 13 ہزار 175 افراد نے اس وائرس کو شکست دے دی ہے جب کہ فعال کیسز کی تعداد گھٹ کر 50 ہزار307 ہوگئی ہے۔

سندھ میں مصدقہ کورونا مریضوں کی تعداد ایک لاکھ 15 ہزار 213 ہوگئی ہے، پنجاب میں 91 ہزار 129 ، خیبرپختونخوا میں 32 ہزار 753 ، بلوچستان میں 11 ہزار 517، اسلام آباد میں 14 ہزار 722، آزاد جموں و کشمیر میں ایک ہزار 961 اور گلگت بلتستان میں ایک ہزار 896 مصدقہ مریض ہیں۔

نیشنل کمانڈ اینڈ آپریشن سینٹر کے مطابق 24 گھنٹوں میں ملک بھر میں کورونا سے 32 افراد کا انتقال ہوا ہے جس کے بعد اس وائرس سے اموات کی مجموعی تعداد 5709 ہو گئی ہے۔ پنجاب میں 2 ہزار 100، سندھ میں 2 ہزار 60، خیبر پختونخوا میں ایک ہزار 158، اسلام آباد میں 162، بلوچستان میں 136، آزاد کشمیر میں 48 اور گلگت بلتستان میں 45 افراد کورونا کے ہاتھوں لقمہ اجل بن چکے ہیں جب کہ ایک ہزار 382 افراد کی حالت تشویشناک ہے۔

کورونا وائرس اور احتیاطی تدابیر:

کورونا وائرس کے خلاف یہ احتیاطی تدابیر اختیار کرنے سے اس وبا کے خلاف جنگ جیتنا آسان ہوسکتا ہے۔ صبح کا کچھ وقت دھوپ میں گزارنا چاہیے، کمروں کو بند کرکے نہ بیٹھیں بلکہ دروازہ کھڑکیاں کھول دیں اور ہلکی دھوپ کو کمروں میں آنے دیں۔ بند کمروں میں اے سی چلاکر بیٹھنے کے بجائے پنکھے کی ہوا میں بیٹھیں۔

سورج کی شعاعوں میں موجود یو وی شعاعیں وائرس کی بیرونی ساخت پر ابھرے ہوئے ہوئے پروٹین کو متاثر کرتی ہیں اور وائرس کو کمزور کردیتی ہیں۔ درجہ حرارت یا گرمی کے زیادہ ہونے سے وائرس پر کوئی اثر نہیں ہوتا لیکن یو وی شعاعوں کے زیادہ پڑنے سے وائرس کمزور ہوجاتا ہے۔

پانی گرم کرکے تھرماس میں رکھ لیں اور ہر ایک گھنٹے بعد آدھا کپ نیم گرم پانی نوش کریں۔ وائرس سب سے پہلے گلے میں انفیکشن کرتا ہے اوروہاں سے پھیپھڑوں تک پہنچ جاتا ہے، گرم پانی کے استعمال سے وائرس گلے سے معدے میں چلا جاتا ہے، جہاں وائرس ناکارہ ہوجاتا ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔