امیتابھ بچن کی کورونا ٹیسٹ منفی آنے کی تردید

 ممبئی: لیجنڈ اداکار امیتابھ بچن نے کورونا ٹیسٹ منفی آنے کی خبروں کی سخت الفاظ میں تردید کرتے ہوئے کہا ہے کہ تاحال اسپتال میں زیر علاج ہوں۔

بھارتی میڈیا پر امیتابھ بچن کے کورونا وائرس ٹیسٹ منفی آنے کی خبروں سے بالی ووڈ کے بے تاج بادشاہ کے ان گنت مداحوں میں خوشی کی لہر دوڑ گئی تھی تاہم اداکار نے سماجی رابطے کی ویب سائٹ ٹویٹر پر ان خبروں کی سختی سے تردید کردی۔

بالی ووڈ پر چار دہائیوں سے راج کرنے والے 77 سالہ امیتابھ بچن نے سماجی رابطے کی ویب سائٹ ٹویٹر پر لکھا کہ کورونا ٹیسٹ منفی آنے کی خبر غلط، جھوٹ اور غیر ذمہ دارانہ ہے۔

.. this news is incorrect , irresponsible , fake and an incorrigible LIE !! https://t.co/uI2xIjMsUU

— Amitabh Bachchan (@SrBachchan) July 23, 2020

دوسری جانب بچن خاندان کے ذرائع نے بھی ان خبروں کی تردید کرتے ہوئے بتایا کہ معروف اداکار اب بھی اسپتال میں زیر علاج ہیں وہ پہلے سے کافی سے بہتر ہیں لیکن مکمل صحت یابی کے لیے کچھ دن اور انتظار کرنا ہوگا۔

یہ خبر بھی پڑھیں : امیتابھ بچن کے بعد ابھیشیک، ایشوریا اور بیٹی آرادھیا بھی کورونا وائرس کا شکار

واضح رہے کہ 11 جولائی کو امیتابھ بچن، ان کے صاحبزادے ابھیشک بچن، بہو ایشوریہ رائے اور پوتی آرادھیا بچن کا کورونا ٹیسٹ مثبت آیا تھا جس کے بعد لیجنڈ اداکار کو اسپتال منتقل کردیا گیا تھا۔