کشمیریوں کو حق خود ارادیت ملنے تک پاکستان ہرممکن مدد جاری رکھے گا، وزیراعظم

 اسلام آباد: وزیراعظم عمران خان نے کہا ہے کہ مسئلہ کشمیر پر پاکستان کی پوزیشن بہت واضح اور غیر متزلزل ہے، کشمیریوں کو حق خود ارادیت ملنے تک پاکستان ہرممکن مدد جاری رکھے گا۔

سماجی رابطے کی ویب سائٹ ٹویٹر پر اپنی ٹویٹ میں وزیراعظم عمران خان کا کہنا تھا کہ مسئلہ کشمیر  پر پاکستان کی پوزیشن بہت واضح اور غیر متزلزل ہے، کشمیریوں کو حق خود ارادیت ملنے تک پاکستان ہر ممکن مدد جاری رکھے گا، جموں و کشمیر کے مسئلے کو سلامتی کونسل کی متعلقہ قراردادوں جو اہلِ کشمیر کو ایک آزاد اور شفاف استصوابِ رائے کے ذریعے خودارادیت کا حق دیتی ہیں، ہی کی روشنی میں حل کیا جائے۔

میں تنازعہ کشمیر جو 70برس سےزائد عرصےسےاقوام متحدہ کی سلامتی کونسل کے ایجنڈےپرموجود ہے،کو دوبارہ زیرِغورلانےپر سلامتی کونسل کاخیرمقدم کرتاہوں۔سلامتی کونسل اقوام متحدہ کےچارٹرکےتحت محض عالمی امن وسلامتی کےتحفظ ہی کی نہیں بلکہ اپنی قراردادوں پرعملدرآمد یقینی بنانےکی بھی ذمہ دار ہے۔

— Imran Khan (@ImranKhanPTI) August 6, 2020

وزیراعظم نے کہا کہ سلامتی کونسل نے کشمیریوں کو صاف شفاف ریفرنڈم کے ذریعے حق خود ارادیت دیا ہے، کونسل ممبران نے کشیدگی میں کمی، عالمی قوانین کے احترام اور مسئلہ کشمیر کے پر امن حل پر زور دیا، میں تنازعہ کشمیر کو دوبارہ زیرِغور لانے اور وادی میں انسانی حقوق کی بگڑتی صورتحال پر تشویش ظاہر کرنے پر کونسل ممبران کا شکر گزار ہوں، سلامتی کونسل اقوام متحدہ کے چارٹر کے تحت محض عالمی امن وسلامتی کے تحفظ ہی کی نہیں بلکہ اپنی قراردادوں پرعملدرآمد یقینی بنانےکی بھی ذمہ دار ہے۔