مقبوضہ کشمیر میں یوم آزادی اور یوم تشکر منایا جارہا ہے

ویب ڈیسک  جمعـء 14 اگست 2020
پاکستان سے اظہار محبت کے لیے سری نگر اور دیگر علاقوں میں سبز ہلالی پرچم لہرادیے گئے فوٹو:فائل

پاکستان سے اظہار محبت کے لیے سری نگر اور دیگر علاقوں میں سبز ہلالی پرچم لہرادیے گئے فوٹو:فائل

 سری نگر: مقبوضہ کشمیر میں بھی آج یوم آزادی پاکستان اور یوم تشکر منایا جارہا ہے جبکہ کل بھارتی یوم آزادی کے موقع پر یوم سیاہ منایاجائے گا۔

حریت کانفرنس کی اپیل پر کشمیری مسلمان 14 اگست کو یوم آزادی اور یوم تشکر کے طور پر منارہے ہیں۔

اس موقع پر سخت پابندیوں اور بھارتی فوج کی بھاری نفری کی تعیناتی کے باوجود کشمیریوں نے پاکستان سے اظہار محبت کے لیے سری نگر اور دیگر علاقوں میں سبز ہلالی پرچم لہرادیے۔

ورثان شہدائے جموں اور تحریک آزادی کشمیر کی طرف سے اس موقع کے حساب سے بنائے گئے سیکڑوں پوسٹرز جگہ جگہ چسپاں کیے گئے ہیں۔

قابض افواج کشمیریوں کو یوم آزادی منانے اور احتجاجی مظاہروں سے روکنے کے لیے بھرپور کوششیں کررہی ہے۔ چپے چپے پر بھارتی فورسز کشمیریوں کو روک کر ان کی تلاشی لی رہی ہے اور پکڑ دھکڑ کا سلسلہ بھی جاری ہے۔

حریت رہنماؤں سید علی گیلانی، شبیر ڈار، بلال صدیقی، عمر عادل اور دیگر نے اپنے بیانات میں پاکستانی عوام کو یوم آزادی کی مبارک باد دیتے ہوئے کہا کہ پاکستان نہ صرف جنوبی ایشیا کے مسلمانوں بلکہ پوری امت مسلمہ کے لیے امید کی کرن ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔