اپوزیشن فیٹف گرے لسٹ سے نکلنے کی کوششیں ناکام بنا رہی ہے، وزیر اعظم

 اسلام آباد: وزیر اعظم عمران خان نے کہا ہے کہ اپوزیشن پاکستان کو ایف اے ٹی ایف کی گرے لسٹ سے نکالنے کی حکومتی کوششوں کو ناکام بنا رہی ہے۔

اس حوالے سے اپنے  ٹویٹ میں انہوں نے کہا ہے کہ  اپوزیشن  نے آج سینیٹ میں ایف اے ٹی ایف سے متعلقہ قانون سازی کے اینٹی منی لانڈرنگ اور آئی سی ٹی وقف کے دو انتہائی اہم بلوں کو منظور نہیں ہونے دیا، میں پہلے دن سے یہ کہہ رہا ہوں کہ حزب مخالف کے رہنما صرف اپنے مفادات کے تحفظ کی تگ و دو میں لگے ہوئے ہیں اور انہیں ملکی مفادات سے کوئی دل چسپی نہیں۔

یہ بھی پڑھیں : نواز شریف سمیت ہر ملزم کو احتساب کا سامنا کرنا ہوگا، وزیر اعظم 

ان کا کہنا تھا کہ اپوزیشن اپنی لوٹ مار کو بچانے کے لیے جمہوریت کے پیچھے چھپنے کی کوشش کرتی ہے، انہوں نے پہلے کورونا وائرس کی حکومت عملی کو شدید تنقید کا نشانہ بنایا حالاں کہ اس حوالے سے ہماری کام یابی کا عالمی سطح پر اعتراف کیا جارہا ہے، اب یہ اپوزیشن ایف ٹی ایف کی گرے لسٹ سے نکلنے کے لیے ہماری کوششوں کو سبوتاژ کررہی ہے۔

Today in Senate the opposition defeated 2 critical FATF-related bills: Anti Money Laundering & ICT Waqf bills. From day one I have maintained that the self-serving interests of the opposition leaders & the country's interests are divergent. As accountability noose has tightened,

— Imran Khan (@ImranKhanPTI) August 25, 2020

عمران خان نے ٹویٹ میں کہا کہ اپوزیشن نے این آر او حاصل کرنے کے لیے نیب کو بدنام اور حکومت کو بلیک میل کیا، یہ تو ملکی معیشت کو تباہ کرکے پاکستان کو ایف اے ٹی ایف کی بلیک لسٹ میں شامل کروادیتے۔

وزیر اعظم کا مزید کہنا تھا کہ ملک مزید کسی این آر او کا متحمل نہیں ہوسکتا، مشرف نے دو این آر اوز دیے جس سے ہمارا قرض چار گنا بڑھا اور معیشت تباہ ہوئی، ہم نے ملکی دولت لوٹنے والوں کو جواب دہ ٹھہرانے کا مینڈیٹ لیا ہے، اپوزیشن این آر او حاصل کرنے کے لیے حکومت کو مسلسل دھمکا رہی ہے، این آر او دینا قوم کے اعتماد کے ساتھ غداری ہوگی، واضح کردوں کہ کچھ بھی ہو جائے کسی کو این آر او نہیں ملے گا۔