ایران نے حملہ کیا تو ہزار گنا شدت سے جواب دیں گے، ٹرمپ

 واشنگٹن: امریکی صدر ڈونلڈ ٹرمپ نے کہا ہے کہ اگر ایران نے حملہ کیا تو اس کا ہزار گنا شدت سے جواب دیں گے۔

امریکی صدر ڈونلڈ ٹرمپ نے سماجی رابطے کی ویب سائٹ ٹویٹر پر ایک ٹویٹ کی ہے جس میں انکشاف کیا گیا ہے کہ ایران اپنے کمانڈر قاسم سلیمانی کی ہلاکت کا بدلہ لینے کے لیے امریکی شخص کو نشانہ بنانے یا امریکا پر حملہ کرنے کی سازش کر رہا ہے۔

امریکی صدر نے اپنی ایک اور ٹویٹ میں ایران کو خبردار کیا کہ اگر کسی بھی شکل میں کوئی حملہ کیا گیا تو امریکا اس سے ہزار گنا شدت سے ایران پر حملہ کرے گا۔ انہوں نے یہ بھی لکھا کہ امریکا نے جنرل قاسم سلیمانی کو امریکی فوجیوں کے قتل کی منصوبہ بندی کرنے پر ہلاک کیا تھا۔

…caused over so many years. Any attack by Iran, in any form, against the United States will be met with an attack on Iran that will be 1,000 times greater in magnitude!

— Donald J. Trump (@realDonaldTrump) September 15, 2020

قبل ازیں میڈیا رپورٹس میں انکشاف کیا گیا تھا کہ ایران اپنے مقتول جنرل کا بدلہ لینے کے لیے امریکا کی جنوبی افریقا میں سفیر لانا مارکس کے قتل کا منصوبہ بنا رہا ہے تاہم وزیر خاجہ مائیک پومپیو نے لانا مارکس کی زندگی خطرے میں ہونے سے متعلق سوال پر براہ راست تبصرہ کرنے سے انکار کردیا تھا۔

دوسری جانب ایران کے وزارت خارجہ کی جانب سے جاری بیان میں کہا گیا ہے کہ میڈیا میں لانا مارکس کے قتل کے منصوبے سے متعلق خبریں جھوٹی اور بے بنیاد ہیں اور یہ ایران مخالف مخصوص مائند سیٹ کا پروپیگنڈا ہے جس کا حقائق سے دور تک تعلق نہیں۔