بھارتی فوج کی ریاستی دہشت گردی میں 2 کشمیری نوجوان شہید

ویب ڈیسک  بدھ 16 ستمبر 2020
نوجوانوں کو ضلع بارہ مولا میں سرچ آپریشن کے دوران شہید کیا گیا، فوٹو : فائل

نوجوانوں کو ضلع بارہ مولا میں سرچ آپریشن کے دوران شہید کیا گیا، فوٹو : فائل

 سری نگر: مقبوضہ کشمیر میں بھارتی فوج کی جارحیت میں دو کشمیری نوجوان شہید ہوگئے۔

کشمیر میڈیا سروس کے مطابق نوجوانوں کی شہادت کا پہلا واقعہ سوپور میں پیش آیا جہاں قابض بھارتی فوج نے تجر شریف کے علاقے میں نام نہاد سرچ آپریشن کے دوران عرفان احمد نامی نوجوان کو حراست میں لے لیا اور رات گئے نوجوان کی تشدد زدہ لاش پھینک گئے۔

اسی طرح ضلع بارہ مولا کے علاقے اُڑی میں بھی سرچ آپریشن کے دوران ایک اور کشمیری نوجوان کو گولیاں مارکر شہید کردیا گیا۔ شہید ہونے والے نوجوان کی شناخت ظاہر نہیں کی گئی جب کہ لاش کو لواحقین کے حوالے کرنے سے انکار کردیا گیا۔

یہ خبر پڑھیں : مقبوضہ کشمیرمیں سرچ آپریشن کے دوران بھارتی فوج پر حملہ، 2 اہلکار شدید زخمی 

ایک ہی دن میں ایک ضلع میں دو نوجوانوں کی شہادت پر علاقہ مکینوں نے شدید احتجاج کیا اور بھارت کے خلاف شدید نعرے بازی کی۔ قابض بھارتی فوج نے مظاہرین کو منتشر کرنے کے لیے ریاستی طاقت کا مظاہرہ کیا اور نہتے شہریوں پر ربڑ کی گولیاں برسائیں اور آنسو گیس کی شیلنگ بھی کی۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔