جنسی زیادتیوں کے خلاف جماعت اسلامی کا وزیراعلیٰ ہاؤس پنجاب کے باہر دھرنا

 لاہور: سانحہ موٹر وے سمیت ملک میں خواتین اور بچوں سے جنسی زیادتیوں کے بڑھتے واقعات اور پنجاب میں امن وامان کی بگڑتی ہوئی صورتحال کے خلاف جماعت اسلامی نے وزیراعلیٰ ہاؤس پنجاب تک مارچ کرکے مال روڈ پر دھرنا دے دیا۔

جماعت اسلامی کے کارکن فیصل چوک میں جمع ہوئے اور نمازظہر کی ادائیگی کے بعد وزیراعلی ہاؤس کی طرف مارچ کیا جہاں انہوں دھرنا دے دیا۔

جماعت اسلامی کے زیراہتمام بچوں بچیوں خواتین کے ساتھ جنسی زیادتی، موٹروے سانحے اور حکومت پنجاب کی نا اہلی کے خلاف عوامی احتجاجی دھرنا، شرکاء مال روڈ پر وزیراعلی ہاؤس کی طرف مارچ کر رہے ہیں#JIDharnaAgainstRapists pic.twitter.com/dOZL6SOfD1

— Jamaat-e-Islami (@JIPOfficial) September 17, 2020

دھرے میں ہزاروں مرد و خواتین اور مختلف شعبہ ہائے زندگی سے تعلق رکھنے والے افراد شریک ہیں۔ مظاہرین موٹروے کیس کے ملزمان سمیت جنسی زیادتی کے دیگر ملزمان کو سرعام پھانسی دینے کا مطالبہ کررہے ہیں۔

شرکاء نے سانحہ موٹروے اور امن و امان کی بدترین صورتحال کے خلاف شدید نعرہ بازی کی۔ انہوں نے پنجاب حکومت کی بدانتظامی اور نااہلی کے خلاف پلے کارڈز اٹھا رکھے ہیں۔

ایوان وزیراعلی کے باہر پولیس کی بھاری نفری موجود ہے اور ہنگامی صورتحال سے نمٹنے کے لئے واٹر کیننن بھی طلب کرلی گئی ہے۔