قومی ٹی 20 کپ ؛ 2 ٹیمیں کپتانوں کی خدمات سے محروم

اسپورٹس رپورٹر  پير 21 ستمبر 2020
شعیب ملک ڈومیسٹک ایونٹ میں شرکت کے لیے دبئی سے وطن واپس آگئے
فوٹو : فائل

شعیب ملک ڈومیسٹک ایونٹ میں شرکت کے لیے دبئی سے وطن واپس آگئے فوٹو : فائل

 لاہور:  قومی ٹی ٹوئنٹی کرکٹ ٹورنامنٹ کے پہلے مرحلے میں 3ٹیموں کو اسٹار کرکٹرز کی کمی محسوس ہوگی۔

سینٹرل پنجاب کو بابر اعظم اور ناردرن کو عماد وسیم کے بغیر نائب کپتانوں پر انحصار کرنا ہوگا،خیبر پختونخوا کو شاہین شاہ آفریدی کی خدمات میسر نہیں ہوں گی، تینوں کھلاڑیوں کی دستیابی راولپنڈی میں شروع ہونے والے دوسرے راؤنڈ سے قبل ہونے کا امکان نہیں، دوسری جانب شعیب ملک ڈومیسٹک ایونٹ میں شرکت کے لیے دبئی سے واپس آگئے۔

تفصیلات کے مطابق قومی ٹی ٹوئنٹی ٹورنامنٹ30 ستمبر سے ملتان میں شروع ہو رہا ہے جہاں پہلے مرحلے میں 6 اکتوبر تک لیگ میچز کھیلے جائیں گے، سینٹرل پنجاب کے کپتان بابر اعظم اس وقت انگلش ٹی ٹوئنٹی بلاسٹ کرکٹ میں سمرسٹ کی نمائندگی کر رہے ہیں، ناردرن کے کپتان عماد وسیم ناٹنگھم شائر کی جانب سے ایکشن میں ہیں، خیبر پختونخوا کی ٹیم میں شامل اہم فاسٹ بولر شاہین شاہ آفریدی ہیمشائر کے اسکواڈ کا حصہ ہیں۔

انگلش ٹی ٹوئنٹی بلاسٹ کا 3 اکتوبر کو اختتام ہوگا،کئی ٹیموں کی پیش قدمی کوارٹر فائنل سے قبل بھی تمام ہو سکتی ہے، بہرحال اگر پاکستانی کرکٹرز کو کاؤنٹیز سے فراغت مل بھی گئی تو سفری انتظامات، قرنطینہ اور کورونا ٹیسٹنگ کے مراحل کے لیے وقت درکار ہوگا، قبل ازیں پی سی بی نے بھی عندیہ دیا تھاکہ تینوں کرکٹرز 9 اکتوبر سے راولپنڈی میں شروع ہونے والے دوسرے مرحلے میں دستیاب ہوں گے،اس صورتحال میں ملتان میں نائب کپتان ایکشن میں ہوں گے۔

ان میچز کے دوران سینٹرل پنجاب کی قیادت سعد نسیم اور ناردرن کی شاداب خان کے سپرد  ہوگی۔ پی سی بی کے ترجمان کا کہنا ہے کہ کھلاڑیوں کے قبل از وقت اسکواڈز کو جوائن کرنے کا انحصار انگلینڈ میں ان کی ٹیموں کی پوزیشن پر ہے۔دوسری جانب اپنی فیملی سے ملاقات کے بعد شعیب ملک دبئی سے واپس آ گئے، آل راؤنڈر ڈومیسٹک ایونٹ میں خیبر پختونخوا کی نمائندگی کریں گے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔