محمد زبیرنے آرمی چیف سے ملاقاتوں کی تصدیق کردی

ویب ڈیسک  بدھ 23 ستمبر 2020
آرمی چیف سے نوازشریف یا پارٹی کے لیے کچھ مانگنے نہیں گیا تھا، رہنما مسلم لیگ (ن)

آرمی چیف سے نوازشریف یا پارٹی کے لیے کچھ مانگنے نہیں گیا تھا، رہنما مسلم لیگ (ن)

 اسلام آباد: سابق گورنر سندھ محمد زبیر نے آرمی چیف جنرل قمر جاوید باجوہ سے ملاقات کی تصدیق کردی۔

ایکسپریس نیوز کے مطابق مسلم لیگ (ن) کے رہنما محمد زبیر نے کہا کہ آرمی چیف جنرل قمر جاوید باجوہ سے میرے ذاتی تعلقات ہیں اور ان سے میری 2 ملاقاتیں ہوئی ہیں البتہ میں نوازشریف یا پارٹی کے لیے کچھ مانگنے نہیں گیا تھا، میں نے کہا کہ میں یہاں کسی کیلئے نہیں آیا۔

محمد زبیر کا کہنا تھا کہ کبھی ان معاملات پر آرمی چیف سے کوئی بات نہیں ہوئی اور سابق وزیراعظم نوازشریف یا ان کی صاحبزادی مریم نواز نے ملاقات کرنے کا نہیں کہا، اس طرح کی ملاقاتیں خفیہ ہوتی ہیں، سمجھ نہیں آتا ترجمان پاک فوج کو بات کرنے کی ضرورت کیوں پڑی۔

اس خبر کو بھی پڑھیں؛ آرمی چیف سے مسلم لیگ (ن) کے محمد زبیر نے 2 ملاقاتیں کیں، ڈی جی آئی ایس پی آر

سابق گورنر سندھ نے کہا کہ اگر معاملات طے کرنے ہوتے تو 2018سے پہلے ہی کرلیتے، ملاقات اور کھانے پر سیاست پر بات چیت ہوتی رہتی ہے، اتنےگھنٹے بیٹھے رہیں گے تو مریم اورنوازشریف پر بھی بات چیت ہوگی۔

واضح رہے مریم نواز نے آج صحافیوں سے بات چیت کے دوران کہا تھا کہ مسلم لیگ (ن) کے رہنماؤں نے آرمی چیف سے ملاقات نہیں کی جس پر ترجمان پاک فوج نے بیان جاری کیا کہ مسلم لیگ (ن) کے محمد زبیر نے آرمی چیف سے 2 ملاقاتیں کیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔