پروموٹ پالیسی کے تحت انٹر سائنس پری میڈیکل کے نتائج جاری

اسٹاف رپورٹر  منگل 29 ستمبر 2020
پری میڈیکل میں1631اے ون، 3534 اے،4309بی، 4165 سی، 7624 ڈی، 3965 طلبہ ای گریڈ میں پاس ہوئے ۔  فوٹو : ایکسپریس

پری میڈیکل میں1631اے ون، 3534 اے،4309بی، 4165 سی، 7624 ڈی، 3965 طلبہ ای گریڈ میں پاس ہوئے ۔ فوٹو : ایکسپریس

 کراچی:  اعلیٰ ثانوی تعلیمی بورڈ کراچی نے انٹر سائنس پری میڈیکل اور میڈیکل ٹیکنالوجی گروپس کے سالانہ امتحانات 2020  کے نتائج کا اعلان کردیا ہے۔

چیئرمین انٹر بورڈ پروفیسر انعام احمد کے مطابق پری میڈیکل گروپ کے امتحانات میں 25321 امیدوار رجسٹرڈ ہوئے جبکہ 25297 امیدوار کامیاب قرار پائے اس طرح کامیابی کا تناسب 99.91 فیصد رہا، میڈیکل ٹیکنالوجی کے امتحانات میں صرف ایک امیدوار رجسٹرڈ ہوا اور سی گریڈ میں کامیابی حاصل کی۔

انھوں نے بتایا کہ کورونا وائرس کی وبا کی وجہ سے اس سال امتحانات منعقد نہیں ہوئے بلکہ طلبا کو پروموٹ کرنے کی حکومتی پالیسی پر عمل کرتے ہوئے تمام طلبہ و طالبات کو گیارہویں جماعت کے حاصل کردہ نمبروں کے مطابق بارہویں جماعت کے پرچوں میں نمبرز دیے گئے ہیں ساتھ ہی بارہویں جماعت کے پرچوں میں 3 فیصد اضافی نمبرز بھی دیے گئے ہیں۔

ناظم امتحانات شجاعت ہاشمی نے نتائج کی تفصیلات بتاتے ہوئے کہا کہ انٹرمیڈیٹ سائنس پری میڈیکل گروپ کے سالانہ امتحانات 2020 کے امتحانات میں 1631 امیدوار اے ون گریڈ، 3534 اے گریڈ، 4309 بی گریڈ، 4165 سی گریڈ، 7624 ڈی گریڈ، 3965 ای گریڈ جبکہ 69 امیدوار صرف پاس قرار پائے۔

یاد رہے کہ اس سال پروموشن پالیسی کے مطابق طلبہ و طالبات کو پوزیشن نہیں دی گئی ہیں، نتائج اعلان کے فوری بعد بورڈ کی ویب سائٹ www.biek.edu.pk پر اپ لوڈ کردیے گئے ہیں، امیدوار اپنے مجموعی نمبرز اعلیٰ ثانوی تعلیمی بورڈ کراچی کی آفیشل اینڈرائڈ ایپ پر بھی دیکھ سکتے ہیں اس اینڈرائڈ ایپ کو گوگل پلے اسٹور پر BIEK کے نام سے سرچ کر کے موبائل میں انسٹال کیا جاسکتا ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔