بھارتی پابندی راحت فتح علی کی آواز کو نہ روک سکی

کراچی: فن کی کوئی سرحدنہیں ہوتی بلکہ وہ نفرتوں کی دیواریں مسمارکردیتاہے اس بات کوراحت فتح علی خان کی گائیکی نے سچ ثابت کردیا۔

راحت فتح علی خان کی بھارت میں لائیوپرفارمنس پر پابندی کے باوجودان کی آواز کے دیوانے سرحدپارکرکے ان کی آواز کو دنیا کی مختلف ممالک میں پھیلارہے ہیں۔تفصیلات کے مطابق پاکستان کے ممتاز گلوکار راحت فتح علی خان اپنی منفرد گائیکی کی بنا پر دنیا بھرمیں مقبول ہیں گزشتہ دنوں بھارتی سرکارنے ان کی ہندوستان میں لائیو پرفارمنس پرپابندی عائدکی تھی جس کے بعدہندوستانی فلم ڈائریکٹرزنے اپنی فلموں کے لیے خود پاکستان آکرگانے ریکارڈکروائے ابھی یہ سلسلہ تھما نہیں ہے۔

ذرائع کے مطابق راحت آئندہ چندروزمیں دبئی کے اسٹوڈیومیں ایک ہندوستانی فلم کے لیے گانے ریکارڈکروائینگے ۔اس حوالے سے ان کے  مداحوں کا کہنا ہے کہ فن کی کوئی سرحدنہیں ہوتی اگراس پرپابندیاں لگائی جائیں تویہ مناسب نہیں ہے راحت ایک بڑا فنکارہے جس نے پاکستان اور سرحد کے پاراپنے فن کالوہامنوایاہے اگر ہندوستان اور پاکستان کی سرکار فنکاروں ،شاعروں ،اورقلمکاروں کے لیے اپنے روایئے میں نرمی پیداکریں توبہترہے ۔