واٹس ایپ میں سات روز بعد میسج غائب ہونے کا نیا آپشن

ویب ڈیسک  جمعـء 6 نومبر 2020
واٹس ایپ نے پیغامات کو سات روز بعد ختم کرنے والا آپشن پیش کردیا ہے۔ فوٹو: بی بی سی

واٹس ایپ نے پیغامات کو سات روز بعد ختم کرنے والا آپشن پیش کردیا ہے۔ فوٹو: بی بی سی

 لندن: واٹس ایپ نے پیغامات کے لیے ایک نیا آپشن پیش کیا ہے جس میں بھیجنے اور وصول کرنے والے کے فون سے پیغامات ازخود سات روز میں غائب ہوجاتےہیں۔

فیس بک نے اس کے لیے ’ڈس اپیئرنگ مسیجز‘ کا آپشن پیش کیا ہے جسے دو ارب صارفین کی گفتگو خفیہ رکھنے کے لیے پیش کیا جارہا ہے۔ کمپنی کے مطابق یہ آپشن اس ماہ کے آخر تک تمام صارفین کے لیے پیش کیا جارہا ہے۔ اپنے ایک بلاگ میں واٹس ایپ انتظامیہ نے کہا ہے ’ سات دن بعد میسج ازخود ختم ہونے کے آپشن کے تحت دماغی سکون ہوگا کہ متن برقرار نہیں رہے گا۔‘ تاہم صارفین چاہیں تو ٹیکسٹ اور تصاویر کے اسکرین شاٹ محفوظ رکھ سکیں گے۔ لیکن یہ آپشن منتخب کرتے ہی پیغامات سات روزتک ہی دیکھیں جاسکیں گے۔

اسی طرح واٹس ایپ کے کسی گروپ کے ایڈمن کے پاس یہ آپشن ہوگا کہ وہ اسے ڈیلیٹ کرسکے اور یوں ہر انفرادی اکاؤنٹ کے ساتھ اس آپشن کو آن یا آف کیا جاسکے گا۔

چند ماہ قبل فیس بک کے چیف ایگزیکٹو مارک زکربرگ نے کہا تھا کہ وہ اپنے تمام پلیٹ فارم پر پرائیویسی کو بہتر بنانے پر کام کررہے ہیں۔ اس آپشن کے بعد سے اگلے نئے پیغامات سات روزہ مہمان ہوں گے جبکہ پرانے پیغامات برقرار رہیں گے۔ تاہم ہر دوست یا فرد کے رابطے کے ساتھ انفرادی طور پر یہ آپشن کھولا یا بند کیا جاسکتا ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔