روسی کمپنی نے کورونا ویکسین کی قیمت کا اعلان کردیا

 ماسکو: روسی کمپنی نے اعلان کیا ہے کہ کورونا ویکسین ’اسپیوٹنک وی‘ جنوری 2021 میں دستیاب ہوگی جس کی پوری دنیا میں قیمت 20 ڈالر ( تین ہزار روپے) ہوگی تاہم ملک بھر میں یہ مفت میں لگائی جائے گی۔

عالمی خبر رساں ادارے کے مطابق روسی کمپنی نے کورونا ویکسین ’’اسپیوٹنک وی ‘‘ کی دنیا بھر کے لیے دو خوراکوں کی قیمت 20 ڈالر مقرر کی ہے جب کہ روسی شہریوں کو یہ ویکسین مفت میں لگائی جائیں گی۔

دوا ساز کمپنی کا دعویٰ ہے کہ اس ویکسین کی پہلی خوراک کے 28 ویں دن 91 فیصد جب کہ دوسری خوراک کے 14 دن بعد یہ 95 فیصد تک مؤثر پائی گئی جب کہ کسی قسم کے مضر اثرارت سامنے نہیں آئے۔

BREAKING: The cost of one dose of the #SputnikV vaccine will be less than $10 for international markets. RDIF continues expanding existing agreements with international manufacturing partners to produce the vaccine for more than 500 million people in 2021.https://t.co/wqzpIKXpKj

— Sputnik V (@sputnikvaccine) November 24, 2020

روسی ویکسین کی پہلی خوراک کا تجربہ 22 ہزار جب کہ دونوں خوراکوں کی آزمائش 19 ہزار رضاکاروں پر کی گئی اور یہ تحقیق معروف عالمی سائنسی جریدے میں شائع کی جائے گی۔

یہ خبر پڑھیں :  امریکی کمپنی نے اپنی تیار کردہ کورونا ویکسین کی قیمت کا اعلان کردیا

کمپنی کا یہ بھی دعویٰ ہے کہ یہ ویکسین آر این اے ویکسین کے مقابلے میں دو گنا سستی ہے جب کہ اسے 2 سے 8 سینٹی گریڈ درجہ حرارت میں رکھا جا سکتا ہے۔

اسپیوٹنک وی ویکسین کو گمالیا ریسرچ انسٹیٹیوٹ آف ایپی ڈیمیولوجی اینڈ مائیکرو بائیولوجی نے تیار کیا ہے جب کہ یہ پہلی ویکسین ہے جسے روس کی وزارت صحت نے رجسٹر بھی کیا ہے۔

واضح رہے کہ روسی صدر ولادیمیر پوٹن نے جی-20 سمٹ کے ورچوئل اجلاس سے آن لائن خطاب میں ضرورت مند ممالک کو کورونا ویکسین کی فراہمی کی پیشکش بھی کرچکے ہیں۔