احد خان چیمہ کی اہلیہ، والدہ سمیت دیگر کے ناقابل ضمانت وارنٹ گرفتاری کا حکم

 لاہور: احتساب عدالت نے سابق ڈی جی ایل ڈی اے احد خان چیمہ کی اہلیہ اور والدہ سمیت دیگر بے نامی دار ملزمان کے ناقابل ضمانت وارنٹ جاری کرنے کا حکم دے دیا۔

احتساب عدالت لاہور کے جج امجد نذیر چوہدری نے آمدن سے زائد اثاثہ جات ریفرنس پر سماعت کی۔ عدالت نے پیش نہ ہونے پر صائمہ احد، فیصل حسن، نازیہ، اشرف، احمد حسن، سعدیہ منصور، نشاط افزا، احمد سعود چیمہ اور سجاد چیمہ کے ناقابل ضمانت وارنٹ گرفتاری جاری کرنے کا حکم دے دیا۔

عدالت نے انویسٹی گیشن افسر کو بھی ایس ایچ او نیب کے ذریعے گرفتار کرنے کا حکم دیتے ہوئے ہدایت کی کہ حکم کی تعمیل کے لیے تمام اداروں اور ایجنسیوں کی معاونت حاصل کر سکتے ہیں۔

یہ بھی پڑھیں: نیب کو جنٹلمین احد چیمہ کو تین سال جیل میں رکھنے سے کیا ملا؟ سپریم کورٹ

عدالت نے احد چیمہ سے ان کی والدہ اور اہلیہ سمیت دیگر ملزمان کے بارے میں پوچھا کہ کیا آپ جانتے ہیں کہ وہ کہاں ہیں؟۔ احد چیمہ نے فیملی اراکین کی رہائش سے لاعلمی کا اظہار کیا۔ فاضل جج نے برہمی کا اظہار کرتے ہوئے پوچھا بتائیں کیا آپ کے بہنوئی فوت ہوچکے ہیں۔ احد چیمہ نے بیان دیا کہ وہ فوت ہو چکے ہیں۔

عدالت نے تمام بے نامی داران کو گرفتار کر کے 30 نومبر تک پیش کرنے کا حکم دے دیا۔