عالمی ومقامی مارکیٹ میں سونے کے نرخ میں بڑی کمی

اسٹاف رپورٹر  ہفتہ 28 نومبر 2020
فی تولہ سونے کی قیمت گھٹ کر 110000روپے ہوگئی ۔ فوٹو : فائل

فی تولہ سونے کی قیمت گھٹ کر 110000روپے ہوگئی ۔ فوٹو : فائل

 کراچی: عالمی ومقامی مارکیٹ میں سونے کے نرخ میں بڑی کمی ہوگئی۔

بین الاقوامی بلین مارکیٹ میں فی اونس 24 قیراط سونے کی قیمت کی کمی سے 1787ڈالر کی سطح پرپہنچنے کے باعث مقامی صرافہ مارکیٹوں میں بھی ہفتے کو فی تولہ اور فی دس گرام سونے کی قیمتوں میں بالترتیب 800روپے اور 686روپے کی کمی واقع ہوئی۔

سونے کی قیمتوں میں کمی کے نتیجے میں کراچی، حیدرآباد، سکھر، ملتان، لاہور، فیصل آباد، اسلام آباد، راولپنڈی، پشاور اور کوئٹہ کی صرافہ مارکیٹوں میں  فی تولہ سونے کی قیمت گھٹ کر 110000روپے اور فی دس گرام سونے کی قیمت گھٹ کر 94307روپے ہوگئی۔

بلین مارکیٹ کے نمائندوں کا کہناہے کہ دبئی گولڈ مارکیٹ کے مقابلے میں پاکستانی صرافہ مارکیٹوں میں ہفتے کو بھی فی تولہ سونے کی قیمت 2000روپے کم رہی ہے۔

تاہم اسکے برعکس فی تولہ چاندی کی قیمت بغیر کسی تبدیلی کے 1180روپے پر مستحکم رہی اور فی دس گرام چاندی کی قیمت بھی 1011روپے 65پیسے پر مستحکم رہی۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔