کورونا ویکسین کیلیے 150 ملین ڈالر مختص کردیے ہیں، معاون خصوصی برائے صحت

ویب ڈیسک / احتشام بشیر  اتوار 29 نومبر 2020
کورونا کی دوسری لہر احتیاطی تدابیر کو نظر انداز کر نے سے آئی، فیصل سلطان فوٹو: فائل

کورونا کی دوسری لہر احتیاطی تدابیر کو نظر انداز کر نے سے آئی، فیصل سلطان فوٹو: فائل

 پشاور: وزیراعظم کے معاون خصوصی برائے صحت فیصل سلطان کا کہنا ہے کہ حکومت نے کورونا ویکسین کے لیے 150 ملین ڈالر مختص کردیے ہیں۔

پشاور میں پریس کانفرنس کے دوران فیصل سلطان نے کہا کہ کورونا کی ویکسین اور اس سے جڑے دیگر معاملات دیکھ رہے ہیں، پاکستان میں 2021 کی پہلی سہ ماہی میں کورونا ویکسین آنے کا امکان ہے ، حکومت نے کورونا کے ویکسین کے حصول کے لیے 150 ملین ڈالر مختص کئے ہیں۔ فواد چوہدری کی ٹیم کو شاباش کی مستحق ہے کہ ہمارے پاس مقامی سطح پر وینٹی لیٹرز بن رہے ہیں جب کہ ماسک بھی وافر مقدار میں موجود ہیں۔

فیصل سلطان نے کہا کہ کورونا وائرس کی تبدیلی کا عمل قدرتی ہے ، ہمیں ابھی تک واضح معلومات نہیں کہ وائرس میں تبدیلی آئی ہے کہ نہیں، کوویڈ 19 کی مثبت شرح فی الوقت 7 فیصد ہے ، مختلف بیماریوں کا شکار 55 سال سے زائد عمر کے افراد کوویڈ کا نشانہ بنتے ہیں، کورونا وائرس کی تبدیلی کا عمل قدرتی ہے، دوسری لہر اس وجہ سے آئی کہ احتیاطی تدابیر کو نظر انداز کر دیا۔

معاون خصوصی برائے صحت کا کہنا تھا کہ پولیو صورتحال کا جائزہ لے رہے ہیں، معاشرے کو پولیو کے خاتمے کے لیے کردار ادا کرنا ہوگا، کورونا کی وجہ سے رکاوٹ آئی لیکن اب پولیو مہم جاری رکھنے کا فیصلہ کیا ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔