آمدن سے زائد اثاثہ جات؛ نیب نے مولانا فضل الرحمان کے قریبی ساتھیوں کو طلب کر لیا

ویب ڈیسک  منگل 1 دسمبر 2020
نیب مولانا فضل الرحمان کے قریبی ساتھیوں سے تحقیقات کرے گی، نیب ذرائع فوٹو: فائل

نیب مولانا فضل الرحمان کے قریبی ساتھیوں سے تحقیقات کرے گی، نیب ذرائع فوٹو: فائل

اپشاور: نیب خیبر پختونخوا نے آمدن سے زائد اثاثہ جات کے معاملے میں جے یو آئی (ف) کے سربراہ مولانا فضل الرحمان کے قریبی ساتھیوں کو طلب کر لیا۔

نیب ذرائع کے مطابق نیب خیبر پختونخوا آمدن سے زائد اثاثہ جات کے معاملے میں جے یو آئی (ف) کے سربراہ مولانا فضل الرحمان کے قریبی ساتھیوں گل اصغر اور نور اصغر سے تحقیقات کرے گی، اس سلسلے میں نیب نے مولانا فضل الرحمان کے قریبی ساتھیوں کو طلب بھی کر لیا ہے۔

نیب ذرائع کا کہنا ہے کہ ممکن ہے مولانا فضل الرحمان کے ساتھی اگلے ہفتے نیب کی تفتیشی ٹیم کے سامنے پیش ہوں۔

واضح رہے کہ نیب نے مولانا فضل الرحمان کے قریبی ساتھی اور سابق ڈی ایف او موسیٰ خان کو بھی گرفتار کیا تھا۔ اس کے علاوہ نیب کی جانب سے مولانا فضل الرحمان کو مبینہ طور پر نوٹس بھی جاری کیا تھا تاہم بعد ازاں نیب نے کسی بھی قسم کے نوٹس کی تردید کردی تھی۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔