کورونا کے پیش نظر سیاسی جلسوں پر پابندی کے لئے لاہور ہائی کورٹ میں درخواست

ویب ڈیسک  ہفتہ 5 دسمبر 2020
کورونا کے شدید پھیلاوٴ کی وجہ سے اسپتالوں میں بسترز کم پڑنے لگے ہیں، درخواست گزار فوٹو: فائل

کورونا کے شدید پھیلاوٴ کی وجہ سے اسپتالوں میں بسترز کم پڑنے لگے ہیں، درخواست گزار فوٹو: فائل

 لاہور: کورونا کی دوسری لہر کے پیش نظر سیاسی جلسوں پر پابندی اور دیگر حفاظتی اقدامات کے لئے ہائی کورٹ میں درخواست دائر کرائی گئی ہے۔

جوڈیشل ایکٹو ازم پینل کے سربراہ اظہر صدیق ایڈووکیٹ کی جانب سے لاہور ہائی کورٹ میں درخواست دائر کی گئی ہے۔ مفاد عامہ کی درخواست میں کورونا کی دوسری لہر پر گہری تشویش کا اظہار کرتے ہوئے موقف اختیار کیا گیا ہے کہ کورونا کے شدید پھیلاوٴ کی وجہ سے اسپتالوں میں بسترز کم پڑنے لگے ہیں، عالمی وائرس سے بچاو کے لئے جلسے جلوسوں اور دیگر اجتماعات پر پابندی لگانا وقت کی ضرورت ہے۔

درخواست میں اپیل کی گئی ہے کہ اسپتالوں میں فارمیسیز کو 24 گھنٹے کھلا رکھا جائے، سینیئر پروفیسر کی رات کے اوقات میں کورونا وارڈ میں موجودگی یقینی بنائی جائے، لواحقین کو مریض کی حالت کے بارے میں اگاہ کیا جائے اور ویڈیو کالز کی سہولت بھی یقینی بنائی جائے۔

واضح رہے کہ اپوزیشن اتحاد (پی ڈی ایم) 13 دسمبر کو لاہور میں جلسے کا اعلان کررکھا ہے جب کہ حکومت کا موقف ہے کہ اپوزیشن کے جلسوں سے کورونا پھیل رہا ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔