پاکستانی کنڈیشنز میں کھیل کر بہت کچھ سیکھنے کا موقع ملے گا، ایرون سمرز

اسپورٹس رپورٹر  منگل 29 دسمبر 2020
ایرون نے شعیب اختر کو آل ٹائم فیورٹ قرار دیتے ہوئے کہا کہ بریٹ لی اور شعیب کی بولنگ دیکھ کر ہمیشہ اچھا لگا

ایرون نے شعیب اختر کو آل ٹائم فیورٹ قرار دیتے ہوئے کہا کہ بریٹ لی اور شعیب کی بولنگ دیکھ کر ہمیشہ اچھا لگا

 لاہور: آسٹریلوی  فاسٹ بولر ایرون سمرز کا کہنا ہے کہ پاکستانی کنڈیشنز میں کھیل کر بہت کچھ سیکھنے کا موقع ملے گا۔

شعیب اختر اور بریٹ لی کی طرح تیز ترین بولر بننے کی خواہش رکھنے والے آسٹریلیا کے فاسٹ بولر ایرون سمر نے نیشنل ہائی پرفارمنس سینٹر میں اظہر محمود کی نگرانی میں ٹریننگ سیشن کے بعد میڈیا سے بات کرتے ہوئے کہا کہ لاہور آکر  ٹریننگ کرنا بہت اچھا لگ رہا ہے، پاکستان کی مختلف کنڈیشنز میں  کھیل کر سیکھنے اور کا موقع ملے گا۔

پاکستان ون ڈے کپ میں سدرن پنجاب کی ٹیم میں شامل ایرون کا کہنا تھا کہ  سدرن پنجاب کی جیت میں اپنی کارکردگی سے حصہ ڈالنے کی کوشش کروں گا، آسٹریلیا  میں مجھے کوچز نے کہا کہ نئی اسکلز سیکھنے کی کوشش کرو، اس لیے یہاں آیا ہوں، میرا یہاں آنے کا مقصد یہی ہے کہ میں سیکھوں اور پھرڈومیسٹک کرکٹ اور   بی بی ایل  میں پرفارم کرکے ٹیم میں جگہ بناوں۔

ایرون نے پاکستان کے فاسٹ بولر شعیب اختر کو آل ٹائم فیورٹ قرار دیتے ہوئے کہا کہ بریٹ لی اور شعیب اختر کی تیز بولنگ  کو دیکھ کر ہمیشہ اچھا لگا۔  کوچ اظہر محمود کے مطابق ایرون سمرز میں بہت صلاحیت ہے۔اس کے پاس  اسپیڈ بھی ہے اور اسکلز بھی ہیں، سدرن پنجاب کے لیے یہ اچھا اضافہ ثابت ہوگا۔

‏واضح رہے ایرون سمرز پہلے آسٹریلوی ہیں جو پاکستان کے ڈومیسٹک کرکٹ میں کھیلیں گے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔