3 ہزاراساتذہ کی عارضی بھرتیوں کیلیے باقاعدہ شیڈول جاری

 راولپنڈی: تمام گرلز اور بوائز ڈگری پوسٹ گریجویٹ کالجز میں3ہزار عارضی کالج اساتذہ کی بھرتیوں کیلیے باقاعدہ شیڈول جاری کر دیا گیا ہے۔

یہ عارضی بھرتیاں صرف 4ماہ کیلیے ہوں گی ،ان عارضی کالج ٹیچرز کو صرف 45ہزار روپے ماہانہ اعزازیہ دیا جائے گا۔ انکی بھرتیاں مقامی کالجز انتظامیہ خود کریگی۔ یہ بھرتیاں کورونا کی وجہ سے تدریسی کورس مکمل نہ ہونے کے باعث کورس کی فوری تکمیل کیلیے کرنے کی اجازت دی گئی۔ شیڈول کے مطابق ان بھرتیوں کیلئے درخواستیں 14اور 15جنوری دو روز وصول کی جائیں گی، 20جنوری کو جمع شدہ درخواستوں کی فہرستیں آویزاں ہوں گی اور21جنوری سے 23جنوری تک انٹرویوز ہوں گے۔

انٹرویوز پرنسپلز کی نگرانی میں قائم 3 رکنی کمیٹیاں کریں گی ،کمیٹی کے دیگر دو ممبران میں وائس پرنسپل یا سینئر موسٹ پروفیسر اور ہیڈ آف ڈیپارٹمنٹ ہوں گے ، یکم فروری کو بھرتی کئے جانے والوں کی فہرستیں آویزاں کر دی جائیں گی، یہ عارضی کالج اساتذہ انٹرنیز فروری سے 31مئی تک فرائض سرانجام دیں گے۔