مالدیپ پرآپ کا ذاتی جزیرہ، 24 گھنٹے کا کرایہ 80 ہزارڈالر

ویب ڈیسک  ہفتہ 16 جنوری 2021
مالدیپ میں واقع یہ دلکش جزیرہ اب مہمانوں کے لیے موجود ہے تاہم 24 گھنٹے کا کرایہ سواکروڑ روپے ہے۔ فوٹو: سی این این

مالدیپ میں واقع یہ دلکش جزیرہ اب مہمانوں کے لیے موجود ہے تاہم 24 گھنٹے کا کرایہ سواکروڑ روپے ہے۔ فوٹو: سی این این

مالدیپ: مالدیپ اس وقت 1200 جزائر کا ملک ہے جس میں دنیا بھر کے سیاح آتے ہیں۔ پوری دنیا میں کووڈ 19 کی وبا کے تناظر میں یہاں لوگوں کی آمدورفت کا سلسلہ جاری ہے اور اب آپ ایک پورا جزیرہ بھی کرائے پر لے سکتے ہیں۔ لیکن اس میں ایک رات ٹھہرنے کا معاوضہ 80 ہزار ڈالر (سواکروڑروپے) ہے۔  

اس جزیرے کو ’اتہافوشی‘ یعنی ذاتی جزیرے کا نام دیا گیا ہے جسے والڈروف ایسٹوریا مالدیپ نامی کمپنی نےخریدا ہے اور یہ ذاتی ملکیت میں مالدیپ کا سب سے بڑا جزیرہ ہے۔ اس کا رقبہ 32000 مربع میٹر ہے اور یہاں تین عمارتوں میں زیادہ سے زیادہ 24 افراد ٹھہرسکتےہیں۔

عمارت کے اندراورباہر غسل کی سہولت ہے ، سوئمنگ پول ہے اور ساحل کے قریب تین خوابگاہوں کا ایک بنگلہ بھی قائم ہے۔ اس طرح ہرعمارت کو ایک بہت جدید انداز میں تعمیر کیا گیا ہے۔ یہاں موجود عملہ مہمانوں کی ہرطرح سے خدمت کرتا ہے۔ ایئرپورٹ سے 40 منٹ کشتی میں سفر کرکے یہاں آسانی سے پہنچا جاسکتا ہے۔ جبکہ 15 منٹ تک چھوٹے ہوائی جہاز سے تمام جزائر کا فضائی جائزہ بھی لیا جاسکتا ہے۔

جزیرے پر مستند باورچیوں کی ایک ٹیم موجود ہے جو آپ کے مشورے سے روزانہ کھانا تیار کرتی ہے۔  اس کےعلاوہ واٹراسپورٹس، کشتی رانی، پارلر اور جِم بھی موجود ہے۔

مالدیپ نے بین الاقوامی سیاحوں کی آمد کی اجازت دیدی ہے تاہم انہیں کچھ عرصے قرنطینہ میں رہنا ہوتا ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔