نیب ہوش کے ناخن لے اور میرے بارے میں غلط خبریں نہ چلوائے، سلیم مانڈوی والا

ویب ڈیسک  پير 18 جنوری 2021
نیب ایسے ہتھکنڈے استعمال کرکے میری ساکھ متاثر نہیں کرسکتا، اعجاز ہارون میرا دوست ہے جس کے لیے جان بھی حاضر ہے (فوٹو : فائل)

نیب ایسے ہتھکنڈے استعمال کرکے میری ساکھ متاثر نہیں کرسکتا، اعجاز ہارون میرا دوست ہے جس کے لیے جان بھی حاضر ہے (فوٹو : فائل)

 اسلام آباد: ڈپٹی چیئرمین سینیٹ سلیم مانڈوی والا نے کہا ہے کہ ترجمان نیب ہوش کے ناخن لے اور مجھ سے متعلق جھوٹی و بے بنیاد خبریں چلوانے سے باز رہے۔

نیب ترجمان کے بیان پر ڈپٹی چیئرمین سینیٹ سلیم مانڈوی والا نے ردعمل دیتے ہوئے کہا ہے کہ اومنی گروپ کی جائیدادوں کے معاملے اور معاہدے سے میرا کوئی تعلق نہیں، اومنی گروپ نے پرائیویٹ ٹرانزیکشن کی جس کا مجھ سے کوئی تعلق نہیں بنتا، نیب میرے حوالے سے غلط خبریں نہ چلائے اور غلط بیانی سے باز رہے۔

سلیم مانڈوی والا نے کہا کہ ترجمان نیب کو ہوش کے ناخن لینے چاہئیٰں، ایسے بیانات سے نیب کی اپنی رہی سہی ساکھ کا بھی نقصان ہوگا، نیب کی کارروائیوں کے حوالے سے عدلیہ، پارلیمنٹ اور سول سوسائٹی کی رائے قوم کے سامنے آ چکی ہے۔

انہوں نے کہا کہ نیب ایسے ہتھکنڈے استعمال کرکے میری ساکھ متاثر نہیں کرسکتا، نیب کا کردار سب کے سامنے آچکا ہے، اعجاز ہارون میرا دوست تھا اور رہے گا اور دوستوں کے لیے میری جان بھی حاضر ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔