کورونا لاک ڈاؤن کے باوجود فضائی آلودگی میں متوقع کمی نہیں ہو سکی

کورونا وائرس کے پھیلنے کے باعث دنیا بھر میں لگائے گئے لاک ڈاؤنز سے فضا میں کچھ بہتری تو آئی مگر ماہرین کے مطابق بہت سے شہروں کی فضا بدستور مضر صحت رہی۔

لاک ڈاؤن کے آغاز میں اگرچہ بہت سے شہروں میں فضا صاف ہوئی مگر سائنس دانوں نے گہرائی سے جب ڈیٹا کو دیکھا تو انکشاف ہوا کہ بہت سے مضر صحت ذرات فضا میں موجود رہے۔ سائنس دانوں کے مطابق فضا میں بہتری کچھ جگہوں میں ہوئی، جب کہ بہت سے شہروں کی فضا میں بہتری امید کے مطابق نہیں آئی۔

سال 2020 کے آغاز میں ووہان اور دوسرے چینی شہروں میں چینی حکومت کی جانب سے بڑے پیمانے پر لگائے گئے لاک ڈاؤن کے بعد سیٹلائیٹ کی مدد سے دیکھا گیا کہ سڑکوں سے گاڑ یوں کے غائب ہو جانے کے بعد فضا میں نائٹروجن ڈائی آکسائڈ کی مقدار میں، جو ایندھن کے جلنے سے پیدا ہوتی ہے، ڈرامائی کمی واقع ہوئی۔ عالمی وبا کے دوران دنیا بھر میں شہروں میں نائٹریجن آکسائڈ کی مقدار میں ایسی ہی کمی دیکھی گئی۔ ماہرین کا کہنا ہے کہ کسی بھی شہر میں آلودہ دن کا زیادہ تر انحصار موسم پر ہوتا ہے۔

اگر تیز ہوائیں چل رہی ہوں تو وہ آلودگی کو اپنے ساتھ لے جاتی ہیں جب کہ جس دن ہوائیں نہ چل رہی ہوں تو آلودگی ایک ہی جگہ موجود رہتی ہے اور سموگ کی کیفیت بھی پیدا ہو سکتی ہے۔

یونیورسٹی آف برمنگھم کے فضائی کیمسٹری کے پروفیسر زونگو شی نے اپنے ساتھیوں کے ساتھ مل کر موجود ڈیٹا سے موسم کے اثرات کو نکال کر فضا میں آلودگی کی مقدار کو دیکھا ہے۔ ان کی تحقیق کے مطابق فضا میں آلودگی کی مقدار کم تو ہوئی ہے مگر آغاز میں لگائے گئے اندازوں سے کہیں کم۔

مثال کے طور پر ووہان میں شروع کے اندازوں کے مطابق نائٹروجن ڈائی آکسائڈ کی مقدار میں 90 فیصد کمی واقع ہوئی۔ مگر شی کے گروپ کی جانب سے کی جانے والی ریسرچ میں یہ معلوم ہوا کہ یہ کمی آلودگی کی صرف ایک تہائی ہی تھی۔ ماہرین کا کہنا ہے کہ اس کی ایک وجہ بہت سی جگہوں پر لاک ڈاؤنز کے بعد کاروبار کا مکمل طور پر معطل نہ ہونا بھی ہے۔

مثال کے طور پر لندن میں مسافر کاروں کے استعمال میں 80 فیصد کمی واقع ہوئی جب کہ ٹرکوں کی ٹریفک میں صرف 30 سے 40 فیصد کمی واقع ہوئی۔ اس کے علاوہ اکثر لوگ گھروں سے کام کر رہے تھے، اس لیے بجلی کے استعمال میں معمولی کمی واقع ہوئی جس کی وجہ سے پاور پلانٹس سے پیدا ہونے والی آلودگی میں کمی نہ ہوئی۔ ماہرین کا کہنا ہے کہ اس وجہ سے جہاں نائٹروجن ڈائی آکسائڈ کی مقدار میں کمی واقع ہوئی تو دوسرے مضر صحت ذرات کی مقدار میں اضافہ بھی دیکھنے میں آیا۔

انسانی صحت پر کام کرنے والے اداروں اور یونیورسٹی آف برٹش کولمبیا کے ماہرین کی تیار کردہ رپورٹ میں کہا گیا ہے کہ دنیا بھر میں فضائی آلودگی اور اس کے اثرات بڑھتے جا رہے ہیں جو نومولود بچوں کی شرح اموات میں تیزی سے اضافے اور بزرگ شہریوں کی ہلاکت کا باعث بن رہی ہے۔

حال ہی میں جاری کی گئی رپورٹ کے مطابق فضائی آلودگی میں اضافے کے باعث پھیپھڑوں کے امراض، سانس لینے کے عمل میں انفیکشن، کینسر، ذیابیطس، دل کے مختلف امراض اور نوزائیدہ بچوں کی اموات میں بڑی تیزی سے اضافہ ہوا ہے۔ رپورٹ میں کہا گیا ہے کہ اندازے کے مطابق سال 2019 میں 66 لاکھ سے زائد افراد فضا میں پائی جانے والی آلودگی کے باعث ہلاک ہوئے جو کل اموات کا 12 فی صد بنتا ہے۔ واضح رہے کہ گزشتہ برس سائنس دانوں نے فضائی آلودگی کو دنیا میں جلد اموات کا پانچواں بڑا سبب قرار دیا تھا جو اب وقت سے پہلے اموات کی چار بڑی وجوہات میں شامل ہو گیا ہے۔ اس فہرست میں فضائی آلودگی سے بھی زیادہ قبل از وقت اموات کی وجوہات میں ہائی بلڈ پریشر، تمباکو نوشی اور بہتر غذا نہ ہونا شامل ہیں۔

رپورٹ میں اس بات کی نشان دہی کی گئی ہے کہ وہ خواتین جو فضائی آلودگی کا دائمی شکار ہوتی ہیں ان کے ہاں اکثر کم وزن یا وقت سے پہلے بچوں کی پیدائش ہوتی ہے۔ ایسے بچے صحت کے مختلف معاملات پر زیادہ رسک پر ہوتے ہیں جس کا عکس اس حقیقت میں بھی نظر آتا ہے کہ اکثر ایسے بچے پیدائش کے پہلے مہینے ہی میں موت کے منہ میں چلے جاتے ہیں۔

’ ترقی پذیر ممالک فضا کے خراب معیار سے سب سے زیادہ متاثر ہیں‘

اسٹیٹ آف گلوبل ایئر 2020 رپورٹ کے مطابق دنیا بھر میں ترقی پذیر ممالک میں صاف ہوا کا معیار سب سے کم ہے جس کی وجہ سے ان ممالک میں اس سے ہونے والی ہلاکتوں کی تعداد بھی سب سے زیادہ ہے۔ اْن ممالک میں جہاں کھانے پکانے اور دیگر گھریلو کاموں کے لیے بڑے پیمانے پر ایندھن کے ٹھوس ذرائع (سالڈ فیول) استعمال کیے جاتے ہیں وہاں آلودگی کی شرح زیادہ پائی گئی۔ ایسے ممالک میں سے بیشتر ایشیا اور افریقہ میں ہیں۔ وسطی جمہوریہ افریقہ، جنوبی سوڈان، برونڈی، مالی، یوگنڈا، تنزانیہ، مڈغاسکر اور روانڈا جیسے ممالک میں آبادی کے 97 فی صد شہری کھانا پکانے کے لیے ایسے ٹھوس ایندھن کے ذرائع استعمال کرتے ہیں جو ان ممالک میں فضائی آلودگی کی بڑی وجہ ہے۔

اگرچہ بعض ممالک جیسے بھارت اور چین میں گھریلو استعمال کی ان اشیا سے فضائی آلودگی میں کمی تو واقع ہوئی ہے اور ان ممالک میں گزشتہ ایک دہائی میں اس کے استعمال میں خاطر خواہ کمی ہوئی ہے۔ مگر اب بھی دنیا کی آدھی آبادی یہ ذرائع استعمال کر رہی ہے جس سے وہ متاثر ہوئے بغیر نہیں رہ سکتے۔

اوزون کی تہہ کو خطرات

رپورٹ میں کہا گیا ہے کہ کرہ ارض پر موجود اوزون کی تہہ میں شگاف کی وجہ سے موسمیاتی تبدیلیوں میں کئی گنا تیزی دیکھی گئی ہے جس کے اثرات انسانی صحت، غذائی فصلوں اور سبزیوں پر بھی پڑ رہے ہیں۔ مختلف انسانی سرگرمیوں مثلاً گاڑیوں سے نکلنے والے دھوئیں، پاور پلانٹس سے گیسوں کے اخراج، صنعتی بوائلرز اور دیگر ذرائع سے نائٹروجن ڈائی آکسائیڈ اور دوسرے نامیاتی مرکبات نکلتے ہیں جس سے اوزون کی تہہ کو نقصان پہنچتا ہے۔ اور گزشتہ 100 سالوں کے دوران اس میں پڑنے والے شگاف میں مختلف مقامات پر 30 سے 70 فی صد تک اضافہ ہوا ہے۔

مختلف ذرائع سے حاصل ہونے والا ڈیٹا یہ بتاتا ہے کہ گزشتہ سال اوزون کی تہہ میں شگاف سے سب سے زیادہ متاثر ہونے والے دس ممالک میں سے تمام کا تعلق ایشیا سے ہے۔ جن میں مشرقِ وسطٰی کے بعض ممالک کے علاوہ بھارت، پاکستان، نیپال، بنگلہ دیش، ایران اور کوریا بھی شامل ہیں۔ رپورٹ میں کہا گیا ہے کہ سال 2010 کے مقابلے میں 2019 میں اوزون تہہ کے شگاف سے متاثر ہونے کی شرح میں اضافہ ہوا ہے۔ کچھ اسی طرح کی صورتِ حال ایتھوپیا، نائیجیریا، کانگو، برازیل میں بھی رہی جہاں کی آبادی کا بڑا حصہ اوزون کی تہہ میں شگاف سے متاثر ہوا ہے۔

فضائی آلودگی سے نمٹنے کے لیے جنوبی ایشیائی ممالک کی کیا تیاری ہے؟

رپورٹ میں بعض ممالک کی جانب سے اس ضمن میں کیے گئے اقدامات پر بھی روشنی ڈالی گئی ہے۔ اس رپورٹ کے مطابق جنوبی ایشیا کے سب سے بڑے ملک بھارت نے 2019 میں صاف ہوا کا قومی پروگرام شروع کیا تھا۔ لیکن اس کا قانونی مینڈیٹ نہ ہونے اور دیگر وجوہات کی بنا پر اس پر کافی تنقید کی جاتی رہی ہے۔ اپریل 2020 میں بھارت کی جانب سے گاڑیوں کے دھوئیں سے اخراج سے متعلق نئے معیار متعارف کرائے گئے جس کے فوائد آئندہ چند سالوں میں نظر آنے کے امکانات ہیں لیکن کرونا وبا کی وجہ سے اس منصوبے پر بھی عمل درآمد میں تاخیر نظر آرہی ہے۔

رپورٹ میں کہا گیا ہے کہ پاکستان میں فضائی آلودگی کے خاتمے کے لیے منظم قومی ایکشن پلان کی کمی نظر آتی ہے حالاں کہ پاکستان میں ایئر کوالٹی سے متعلق قوانین میں اسے بڑے بہتر انداز سے بیان کیا گیا ہے۔ تاہم پاکستان کی سپریم کورٹ کے حکم پر اینٹوں کے بھٹوں، زرعی فضلہ جلانے اور صنعتوں سے خارج ہونے والی فضائی آلودگی پر قابو پانے کے لیے بعض اقدامات کو مثبت پیش رفت قرار دیا گیا ہے لیکن دوسری جانب گاڑیوں کے دھوئیں کے اخراج کے لیے اب تک پرانی ٹیکنالوجی پر انحصار اور چھوٹی، غیر رسمی صنعتوں سے آلودگی کے اخراج کو اب تک ریگولیٹ نہیں کیا گیا۔

بنگلہ دیش کے بارے میں رپورٹ میں بتایا گیا ہے کہ 2019 میں کلین ایئر بل منظور کیے جانے کے بعد صاف ہوا اور پائیدار ماحولیاتی ترقی کے لیے کئی اقدامات کیے جارہے ہیں جن میں اینٹوں کے بھٹوں اور ٹرانسپورٹ سیکٹر میں آلودگی میں کمی کے لیے کیے جانے والے اقدامات اہم ہیں۔

کورونا وبا سے ہوا کے معیار پر مثبت لیکن عارضی اثرات

کورونا وبا کی وجہ سے دنیا بھر اور مقامی سطح پر بھی آمدورفت، تعلیمی اداروں کی بندش اور کاروبار کے ساتھ بڑی صنعتی سرگرمیوں میں ڈرامائی کمی دیکھی گئی۔ رپورٹ میں کہا گیا ہے کہ کورونا وبا میں ان عوامل کی وجہ سے کئی ممالک میں ہوا کے معیار میں قدرے بہتری دیکھنے میں آئی۔ کئی ممالک میں ایک عرصے کے بعد صاف نیلا آسمان اور ستاروں بھری راتیں دیکھنے کا موقع ملا۔

سیٹیلائٹ اور زمینی مانیٹرنگ ڈیٹا یہ ظاہر کرتا ہے کہ آلودگی پھیلانے کا باعث بننے والی نائٹروجن ڈائی آکسائیڈ سمیت آلودگی پھیلانے والے گیسز کے اخراج میں خاطر خواہ کمی کے نتیجے میں موسمیاتی عوامل بشمول درجہ حرارت میں بھی کمی اور نتیجتاً اوزون کا شگاف پْر ہونے میں کسی حد تک بہتری دیکھنے میں آئی ہے لیکن رپورٹ میں کہا گیا ہے کہ شواہد بتاتے ہیں کہ یہ تبدیلیاں عارضی ثابت ہوں گی، کورونا کی وبا کے باعث لگنے والی پابندیاں ہٹنے کے بعد آلودگی دوبارہ بڑھنے سے اس بارے میں حاصل ہونے والی کامیابیاں تیزی سے کم ہو جائیں گی۔ اس طرح کرونا کی وبا فضائی آلودگی کے خلاف ایک عارضی مہلت ہی ثابت ہو گی۔ لیکن صاف ہوا کے باعث نیلگوں آسمان کے نظارے ایک بار پھر اس بات کی یقین دہانی کراتے ہیں کہ آلودگی نے ہم سے کیا کچھ چھین لیا ہے۔

رپورٹ پر ماہرین ماحولیات کیا کہتے ہیں؟

ماہرِ ماحولیات رفیع الحق کا کہنا ہے کہ اس سے پہلے ایک اور تحقیق میں بتایا گیا تھا کہ جنوبی ایشیا میں خواتین پر آلودگی کے اثرات کی بڑی وجہ وٹامن ڈی کی کمی ہے۔ وٹامن ڈی کی کمی کی بڑی وجہ ان خواتین کا دھوپ سے سامنا کم ہونا ہے۔ خاص طور پر جب شہری علاقوں میں کھلے مقامات کی کمی ہو گئی ہے، ہر چیز کو کنکریٹ میں چھپا دیا گیا ہے، گھروں میں برآمدے، صحن اور دالان کا تصور تقریباً ختم ہو گیا ہے۔ اسی طرح کھلے عوامی مقامات، پارکس اور گراؤنڈ ختم ہونے سے یہ بیماریاں مزید بڑھنے لگی ہیں۔

اْن کے بقول انسان نے سہل پسندی کی عادات اپنا کر اپنے جسم کو مشقت کے کاموں سے دور کر لیا ہے، گرمی سے بچنے کے لیے اسپلٹ/ایئرکنڈیشنز کا استعمال بڑھ گیا، جس سے ایک جانب کلوروفلورو گیسز کا اخراج بڑھا تو دوسری جانب اس میں زیادہ وقت گزارنے سے ہڈیوں اور سانس کے امراض میں تیزی سے اضافہ ہوا ہے۔ رفیع الحق کے مطابق فضائی آلودگی کو کم کرنے کے لیے شجر کاری کی اشد ضرورت ہے۔

اْن کے بقول قدرتی نظام کے سامنے دیوار بننے کے رویوں کے بجائے اسے اپنانا ہوگا، قدرت کے قریب آنا پڑے گا اور اس کے لیے آج سے کوشش کرنا ہو گی تو اس کے نتائج کل کی نسلوں کو ملیں گے۔ دوسری جانب جامعہ کراچی کے شعبہ ماحولیات کے چیئرمین ڈاکٹر معظم علی خان کا کہنا ہے کہ اب وقت آگیا ہے کہ ہمیں توانائی کے متبادل قابلِ تجدید ذرائع کی جانب جانا ہو گا۔ انہوں نے بتایا کہ ہمیں صنعتی ترقی میں پائیدار ترقی کی راہ اپنانے کی اشد ضرورت ہے اور اس میں بھی ہمیں گرین ٹیکنالوجی اپنانے کی ضرورت ہے جس سے آلودگی بالکل نہ پھیلے۔

اْن کے بقول پاکستان سمیت دیگر ترقی پذیر ممالک کا مسئلہ یہ ہے کہ وہ ماحولیات کو ترجیح نہیں دیتے بلکہ اسے ترقی کی راہ میں رکاوٹ سمجھتے ہیں۔ ان کے مطابق اصل مسئلہ یہ ہے کہ ہم نے صنعتی ترقی اور ماحولیاتی بقا کے درمیان توازن کیسے برقرار رکھنا ہے۔

ڈاکٹر معظم علی خان کے خیال میں اب پاکستان اور اس جیسے دیگر ترقی پذیر ممالک کو یہ طے کرنا ہو گا کہ ترقی کے پیمانے کیا ہوں گے۔ صنعتی ترقی، انفراسٹرکچر، پانی اور توانائی کے حصول کے ایسے منصوبے اس طرح قائم کیے جائیں کہ جس سے ماحولیاتی بقا اور تحفظ کو ممکن بنایا جاسکے۔ اگر ہم یہ کام نہیں کریں گے تو ہم ترقی پذیر بلکہ پسماندہ ہی رہیں گے۔

اگرچہ پاکستان میں برسرِ اقتدار تحریک انصاف کی حکومت کا دعویٰ ہے کہ موسمیاتی تبدیلی سے نبردآزما ہونا ان کی ترجیحات میں سے ایک ہے جب کہ اس مقصد کے لیے مختلف منصوبوں کے لیے 80 کروڑ روپے سے زائد رقم مختص کی جا چکی ہے۔

پاکستان کی الیکٹرک وہیکل پالیسی کے تحت ملک میں 2030 تک 30 فی صد گاڑیاں بجلی سے چلائے جانے کا پروگرام ہے، اسی طرح ملک کے سب سے بڑے شہر کراچی میں دنیا کی پہلی ایسی میٹرولائن قائم کرنے کا منصوبہ بنایا گیا ہے جس پر چلنے والی گاڑیوں سے بالکل آلودگی نہیں پھیلے گی۔

پاکستان نے پلاسٹک کے مضر بیگز کے استعمال پر پابندی کے ساتھ پانی کے ذرائع کو بہتر طریقے سے استعمال کرنے کے منصوبے بھی بنائے ہیں جب کہ 2030 تک صاف ذرائع سے 60 فی صد توانائی کا حصول ممکن بنانے کے لیے بھی اقدامات کیے جا رہے ہیں۔ حکومت کا ملک میں 10 ارب درخت لگانے کا منصوبہ بھی اسی منصوبے کا حصہ ہے۔

ماہرین کا کہنا ہے کہ حکومتِ پاکستان نے موسمیاتی تبدیلی کے نام پر الگ وزارت قائم کر رکھی جو دنیا میں کہیں نہیں لیکن اس کے باوجود یہ مسائل حل نہ ہونے کی وجہ پالیسی بنانے والے اور فیصلہ سازی کرنے والوں کو اصل مسائل کا ادراک کم اور عملدرآمد کا فقدان ہے۔

( بشکریہ وائس آف امریکا)