سعودی فلم کمیشن نے 28 فلمی منصوبوں کی منظوری دیدی

ریاض: سعودی فلم کمیشن نے ‘لائٹ’ مقابلے میں فاتح قرار پانے والے پروڈیوسرز کے ساتھ نئے فلمی منصوبوں پر دستخط کیے ہیں۔

عرب نیوز کے مطابق سعودی عرب میں گزشتہ سال ستمبر میں ’لائٹ‘ مقابلہ کے نام سے ایک پروجیکٹ کا آغاز کیا گیا تھا جس کا مقصد فلم سازوں کو سپورٹ کرنا تھا اور بعد ازاں اس منصوبے میں 35 فلمیں پیش کی گئیں تاہم 7 منصوبوں کو کامیابی حاصل نہیں ہوئی اور باقی 28 کو منظور کرلیا گیا۔

Launched on September 29, Daw’ (meaning Light in Arabic) is a competition supporting 35 Saudi cinematic projects. It is one of many initiatives including the @RedSeaFilm Festival which nurture the flourishing #Saudi film scene pic.twitter.com/I6G0lGq8bw

— Saudi Embassy (@SaudiEmbassyUSA) October 1, 2019

سعودی فلم کمیشن نے کامیاب ہونے والے امیدواروں کا اعلان بھی کیا جس میں 8 امیدوار مکمل تحریری فلموں میں کامیاب ہوئے، مختصر دورانیے کی فلموں میں 11 امیدواروں کو کامیابی حاصل ہوئی جب کہ 6 فیچرفلموں کے منصوبے پیش کرنے والے امیداروں اور طلبا کی جانب سے پیش کیے گئے 3 فلمی منصوبوں کو کامیابی حاصل ہوئی۔

گزشتہ روز سعودی فلم کمیشن نے لائٹ مقابلے میں کامیاب ہونے والے 28 فلم سازوں کے ساتھ کام کرنے کا اعلان کرتے ہوئے ایک نئے معاہدے پر دستخط کردیے ہیں جس کے تحت سعودی عرب میں فیچر فلموں، چھوٹی اور بڑی فلموں کے 28 منصوبوں پر کام کیا جائے گا۔

ریاض میں منعقد ہونے والی تقریب میں‌ نئے فلمی منصوبوں پر 40 ملین ریال کا بجٹ مختص کیا گیا ہے، اس موقعے پر سعودی وزارت ثقافت کے عہدیدار اور مملکت میں فلم سازی میں دلچسپی رکھنے والے افراد کی بڑی تعداد موجود تھی۔

بعد ازاں فلم اتھارٹی کے سی ای او عبد اللہ آل عیاف القحطانی نے وزیر ثقافت، شہزادہ بدر بن عبد اللہ بن فرحان ثقافتی منصوبوں کے لیے مستقل معاونت اور سینما کی صنعت کو فعال بنانے کی ان کی کوششوں پر شکریہ ادا کیا۔