شوبازوں نے پولیس کی وردی بدلی کی مگر اصلاحات کیلئے اقدامات نہ کئے، فردوس عاشق

ویب ڈیسک  منگل 26 جنوری 2021
پنجاب حکومت نے ایس پیز اور ڈی ایس پیز کی ترقیوں کے لئے سروس رولز کی منظوری دے دی، فردوس عاشق اعوان فوٹو: فائل

پنجاب حکومت نے ایس پیز اور ڈی ایس پیز کی ترقیوں کے لئے سروس رولز کی منظوری دے دی، فردوس عاشق اعوان فوٹو: فائل

 لاہور: وزیراعلی پنجاب کی معاون خصوصی فردوس عاشق اعوان کا کہنا ہے کہ ماضی کے شوبازوں نے پولیس فورس کی وردی تو تبدیل کی مگر پولیس اصلاحات کے لئے کوئی اقدامات نہ کئے۔

اپنی ٹوئٹ میں فردوس عاشق اعوان نے کہا کہ ماضی کے شوبازوں نے پولیس فورس کی وردی تو تبدیل کی مگر پولیس اصلاحات کیلئے کوئی اقدامات نہ کئے، وزیراعلی پنجاب سردار عثمان بزدار کی قیادت میں محکمہ پولیس کی کارکردگی میں بہتری کے ساتھ ساتھ افسران و اہلکاروں کے رویے اور سوچ میں تبدیلی کے لئے اصلاحات کا عمل جاری ہے۔

فردوس عاشق اعوان نے کہا کہ پنجاب حکومت نے عملی اقدامات اٹھاتےہوئے ایس پیز اور ڈی ایس پیز کی ترقیوں کے لئے سروس رولز کی منظوری دے دی۔ ترقیوں کے بعد 21 ایس پیز، 125 ڈی ایس پی (ایگزیکٹو) اور 100 ڈی ایس پی (لیگل) کی تعیناتی سے ناصرف پولیسنگ کا نظام بہتر ہوگا بلکہ برسوں سے ترقی کے منتظر کانسٹیبلز بھی بروقت اگلے عہدوں پر جاسکیں گے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔