پریزیڈنٹ ٹرافی کرکٹ واپڈا نے پی آئی اے کو5وکٹ سے قابو کر لیا

کراچی: پریذیڈنٹ ٹرافی کرکٹ ٹورنامنٹ میں واپڈا نے پی آئی اے کو5 وکٹ سے قابو کرلیا۔

ذوالفقار بابر کی شاندار بولنگ کے بعد علی رفیق اور عامر سجاد نے پانچویں وکٹ کیلیے132کی شراکت بناکر ٹیم کو فتح سے ہمکنار کرایا،زرعی ترقیاتی بینک نے کے آر ایل کو3 وکٹ سے ہرا دیا، زوہیب خان کی ناقابل شکست ففٹی اہم رہی، حبیب بینک اور سوئی ناردرن گیس کا مقابلہ ڈرا ہوگیا،بینک نے دوسری اننگز میں 8 وکٹ پر 178رنز بناکر مجموعی سبقت307 تک پہنچائی، اسد بیگ67 اور عمران فرحت51رنز کے ساتھ نمایاں رہے،سیالکوٹ میں گرائونڈ کی خراب حالت کے پیش نظر چوتھے دن کا کھیل بھی ممکن نہیں ہوسکا، یوں پورٹ قاسم اور نیشنل بینک کا مقابلہ ہارجیت کے بغیر ختم ہوگیا۔تفصیلات کے مطابق پریذیڈنٹ ٹرافی کرکٹ گریڈ ون کے آٹھویں رائونڈ میچز کے اختتامی دن واپڈا نے پی آئی اے کو 5 وکٹ سے قابو کرلیا،207 رنزکا تعاقب کرنے والی ٹیم نے گذشتہ دن کے اسکور10-2 سے نامکمل اننگز شروع کی، ٹیم نے65.4 اوورز میں مزید3وکٹیں کھوکر209رنز بنالیے، عدنان رئیس(8) اورمحمد حسیب(2) کے میدان بدر ہونے پر ٹیم 22 پر 4 ٹاپ آرڈر پلیئرزسے محروم ہوگئی، علی رفیق اور عامر سجاد نے پانچویں وکٹ کیلیے 132کی شراکت بناکر ٹیم کو فتح کی راہ پر گامزن رکھا۔

عامر سجاد 83رنز بنانے کے بعد فیصل اقبال کی گیند پر انہی کو کیچ دے بیٹھے جبکہ علی رفیق 83 پر ناقابل شکست رہے، ایاز تصور (26 ناٹ آئوٹ) نے ان کا ساتھ نبھاتے ہوئے ٹیم کو فتح دلائی، نجف اور علی رضا کو 2،2 وکٹیں ملیں۔ زرعی ترقیاتی بینک نے کے آر ایل کو3 وکٹ سے پچھاڑدیا، زوہیب کی ناقابل شکست ففٹی کی بدولت ٹیم نے7 وکٹ پر184 رنز بنالیے، میچ کے اختتامی دن انھیں پانچ وکٹوں کی موجودگی میں مزید 72رنز درکار تھے، زوہیب54 پرناٹ آئوٹ رہے جبکہ ذوالقرنین حیدر25 رنز بناکر پویلین واپس لوٹے، صدف حسین اور یاسرعلی نے2،2 کھلاڑیوں کو آئوٹ کیا۔حبیب بینک اور سوئی ناردرن گیس کا مقابلہ ڈرا ہوگیا، سوئی ناردرن کی پہلی اننگز 321 پر تمام ہوئی۔

محمد رضوان 46 اور خرم شہزاد32رنز بنانے میں کامیاب رہے، احسان عادل اور محمد اسلم نے چار، چار وکٹیں لیں، پہلی باری میں 450 کا مجموعہ ترتیب دینے والی حبیب بینک کی ٹیم نے کھیل ختم ہونے تک دوسری اننگز میں 8 وکٹ پر 178رنز بنائے، یوں مجموعی سبقت 307 تک پہنچ گئی، اسد بیگ 67 اور عمران فرحت51رنز کیساتھ نمایاں رہے، خرم شہزاد نے 3 جبکہ عمران علی اور یاسر شاہ نے 2،2 کھلاڑیوں کو واپسی کے پروانے تھمائے۔سیالکوٹ میں پورٹ قاسم اور نیشنل بینک کا مقابلہ ہارجیت کا فیصلہ ہوئے بغیر ختم ہوگیا، گرائونڈ کی خراب حالت کے پیش نظر چوتھے دن کا کھیل بھی ممکن نہیں ہوپایا، دوسرے دن کا اسکور ہی حتمی ثابت ہوا، جس میں پورٹ قاسم نے4 وکٹ پر152رنز بناکر 279 کی برتری لے رکھی تھی۔