آن لائن گیمز کی تشہیر پر ویرات کوہلی اور تمنا بھاٹیا سے جواب طلب

کیرالا: بھارتی عدالت نے آن لائن کارڈ گیمز کی تشہیر کرنے پر ویرات کوہلی اور تمنا بھاٹیا سے جواب طلب کرلیا۔

بھارتی میڈیا کے مطابق کیرالا ہائی کورٹ میں شہری کی جانب سے درخواست دائر کی گئی جس میں کہا گیا کہ ویرات کوہلی اور تمنا بھاٹیا سمیت دیگر اداکار آن لائن کارڈ گیمز کے ایمبیسڈر ہیں جس کی وجہ سے لوگوں کی بڑی تعداد اس جانب متوجہ ہورہی ہے، آن لائن کارڈ گیمز دن بدن مقبول ہورہے ہیں لہذا قانونی طور پر ان گیمز پر پابندی عائد کی جائے۔

عدالت نے درخوست گزار کی استدعا پر کرکٹر ویرات کوہلی، اداکارہ تمنا بھاٹیا سمیت ملیالم اداکار اور کیرالا حکومت کو آن لائن کارڈ گیمز کی تشہیر پر نوٹس بھیجتے ہوئے جواب طلب کرلیا۔

واضح رہے کہ اس سے قبل مدراس ہائی کورٹ میں بھی ایک درخواست دائر کی گئی تھی جس میں کرکٹر ویرات کوہلی اور اداکارہ تمنا بھاٹیا کو آن لائن کارڈ گیمز کی تشہیر پر گرفتار کرنے کی استدعا کرتے ہوئے کہا گیا تھا کہ گیمز نوجوانوں کی زندگیاں لے رہے ہیں۔